გოგა ხაინდრავა – 2008 წელს სააკაშვილმა საქართველოში ტანკები შემოიყვანა, სალომემ კი, მთელ ქართველ ხალხთან ერთად, გაიყვანა

რეჟისორმა გოგა ხაინდრავამ ქუთაისში, ლადო მესხიშვილის სახელობის თეატრში მოსახლეობასთან შეხვედრისას, განაცხადა, რომ ისეთი რამ, რაც წინასაარჩევნო პერიოდში ქალი საპრეზიდენტო კანდიდატის მიმართ ხდებოდა, აღარ განმეორდება. მისი თქმით, პრეზიდენტობის დამოუკიდებელი კანდიდატი ის პიროვნებაა, რომელმაც 2008 წელს ყოფილი პრეზიდენტის, მიხეილ სააკაშვილის შემოყვანილი ტანკები, ქართველ ხალხთან ერთად, გაიყვანა.
“ღირსების გულისთვის ჩამოვედით ჩვენ აქ. 25 წლის განმავლობაში, როდესაც დამოუკიდებელი საქართველო ყალიბდებოდა, ყოველთვის ღირსების საკითხი იდგა პირველ რიგში. ჩვენ ქვეყანაში აღარ იქნება ისეთი რამ, რაც აქამდე იყო, როგორ შეურაცხყოფასაც აყენებდნენ სალომე ზურაბიშვილს. ამით ყველა ჩვენს ქალბატონს აყენებდნენ შეურაცხყოფას და ეს დამთავრდა. ასეთი რამ აღარ იქნება ამ ქვეყანაში. ჩვენ სალომე ზურაბიშვილის გვერდით ვიქნებით. მან ქართული სული და ქართული ღირსება სულ თან ატარა. 2008 წელს სააკაშვილმა საქართველოში ტანკები შემოიყვანა, სალომემ კი ის ტანკები, მთელ ქართველ ხალხთან ერთად, გაიყვანა, იმიტომ, რომ ეს იყო ჩვენი წადილი”, – განაცხადა გოგა ხაინდრავამ.