თემქაზე მოკლული 20 წლის ანა ნაცვლიშვილის საქმეზე მსჯავრდებულის ადვოკატი ნაირა ოტიაშვილი ლადო გრიგალაშვილის გამართლებას ითხოვს. ის ამ მოთხოვნით სააპელაციოსთვის მიმართვას აპირებს. ამის შესახებ ინფორმაციას სააგენტო “ინტერპრესნიუსი” ავრცელებს.
ადვოკატი აცხადებს, რომ ამ საქმეზე ბრალდების მხარემ მტკიცებულებების წარმოდგენა ვერ შეძლო. მას შემდეგ, რაც დასაბუთებული განაჩენი ჩაბარდება, ოტიაშვილი საჩივრით სააპელაციო სასამართლოს მიმართავს.
ადვოკატი ამბობს, რომ სააპელაციოში ის ლადო გრიგალაშვილისთვის გამამართლებელ განაჩენს მოითხოვს.
“დანაზე გოგონას დნმ არის ამოსული, გოგონას დნმ-ს რა უნდა დანაზე, თუ ფალსიფიკაცია არ მოხდა? გოგონას ეჭირა დანა ხელში? აქედან გამომდინარე, ვასაჩივრებთ, დავასაბუთებთ და იმსჯელებს ზემდგომი ინსტანციის სასამართლო. მთლიანად ვასაჩივრებთ. გამამტყუნებელი განაჩენი უნდა ემყარებოდეს უტყუარ მტკიცებულებათა ერთობლიობას”, – ამბობს ადვოკატი ნაირა ოტიაშვილი.
22 თებერვალს, გამთენიისას, თემქაზე გოგო კორპუსის უკან, პატარა სკვერში ყელგამოჭრილი იპოვეს. 21 წლის ანა ნაცვლიშვილის მკვლელობის ბრალდებით მისი ყოფილი შეყვარებული ლადო გრიგალაშვილი იმავე დღეს დააკავეს. 14 ნოემბერს გრიგალაშვილს სასამართლომ უვადო პატიმრობა მიუსაჯა.