ადვოკატთა ასოციაციის თავმჯდომარემ დავით ასათიანმა ადვოკატთა საქმიანობაში ჩარევისა და პროფესიული საქმიანობის განხორციელებაში ხელის შეშლის ფაქტების შესახებ ისაუბრა. როგორც დღეს გამართულ ბრიფინგზე ასათიანმა განაცხადა, სოციალურ ქსელში გამოჩნდა გვერდი, რომელიც ადვოკატთა ასოციაციის დისკრედიტაციას ეწევა.
ასათიანის თქმით, აღნიშნული გვერდი 6 დეკემბერს ფეისბუქის ადმინისტრაციამ წაშალა, თუმცა მისი შემქმნელები იმუქრებოდნენ, რომ მსგავსი ტიპის მადისკრედიტირებელი გვერდები მომავალშიც შეიქმნებოდა.
დავით ასათიანმა შინაგან საქმეთა სამინისტროს და პროკურატურას მოუწოდა, დაინტერესდეს ამ საკითხით და გამოავლინოს ყველა ის პირი, ვინც ჩართულია აღნიშნულ ქმედებებში.
“რამდენიმე ფაქტი დაფიქსირდა, როცა ადვოკატები პროფესიული საქმიანობის განხორციელების ფარგლებში გახდნენ ობიექტები თავდასხმისა და შეურაცხყოფის. ჩვენ გვაქვს ძალიან პრინციპული პოზიცია, თითოეული ადვოკატი თავისი პროფესიული საქმიანობის ფარგლებში უნდა იყოს თავისუფალი და მათზე რაიმე სახის ზეწოლა არ უნდა განხორციელდეს. ჩვენმა საზოგადოებამ უნდა გაიგოს, რომ ადვოკატის და კლიენტის იდენტიფიცირება არ შეიძლება. არ შეიძლება აგრესია გადატანილი იქნეს ადვოკატზე. ჩვენ მივმართავთ შესაბამის ორგანოებს დაინტერესდნენ აღნიშნულით”, – განაცხადა დავით ასათიანმა.