ლევან მურუსიძე – თავისი ინიციატივით მოვიდა და ბრძანა, ჩემთვის დიდი პატივია, თქვენთან გავაფორმოთ მემორანდუმიო. სამი თვის შემდეგ კი, მე გავხდი მურუსიძე

მოსამართლემ, ლევან მურუსიძემ იუსტიციის უმაღლესი საბჭოს სხდომაზე სიტყვით გამოსვლისას იმ პერიოდზე ისაუბრა, რომლის შემდეგაც მას “მურუსიძედ” მოიხსენიებენ. როგორც მან აღნიშნა, მასთან მაშინდელი საქართველოს სასაზღვრო პოლიციის უფროსის მოადგილე ეკა გიგაური მივიდა და მემორანდუმი გაუფორმა, სამი თვის შემდეგ კი “მურუსიძე” გახდა.
„სასამართლო კონტინგენტზე არასამთავრობო ორგანიზაციის წარმომადგენლები იძახდნენ, ჩვენ სააკაშვილის ხელისუფლებისგან იმით უნდა ვიყოთ განსხვავებული, რომ არ უნდა გავუშვათ ეს მოსამართლეები ვადაზე ადრე, მაგრამ როდესაც მათ ვადა ამოეწურებათ, იმიტომ რომ მუშაობდნენ სააკაშვილის პერიოდში, მათ უნდა დატოვონ თანამდებობა. მე ვიყავი ამის პრინციპული წინააღმდეგი და ჩემს გარშემო გაერთიანდა სასამართლო კორპუსი და ზუსტად ამ სასამართლო კორპუსის გაერთიანების გამო, ჩვენ ვიბრძოდით დამოუკიდებლობისთვის. მე მეტსაც გეტყვით, ვიდრე ჩემს წინააღმდეგ ასეთი დარტყმები წამოვიდოდა, ჩემთან ეკა გიგაური თავისი ინიციატივით მოვიდა და ბრძანა, ჩემთვის დიდი პატივია, თქვენთან გავაფორმოთ მემორანდუმიო და გავაფორმეთ. სამი თვის შემდეგ კი, მე გავხდი მურუსიძე”, – განაცხადა მურუსიძემ.