“ქართული ოცნების“ დეპუტატი ვანო ზარდიაშვილი საზოგადოებას მიმართავს, 14 იანვარს – სახელმწიფო დროშის დღეს საკუთარი სახლის ფანჯრებიდან და აივნებიდან სახელმწიფო დროშა გადმოფინონ.
ზარდიაშვილის განცხადებას პარლამენტის პრესასთან და საზოგადოებასთან ურთიერთობის სამსახური ავრცელებს.
დეპუტატი ამბობს, რომ 14 იანვარი ნამდვილ ეროვნულ, სახალხო დღესასწაულად უნდა იქცეს.
“14 იანვარი – სახელმწიფო დროშის დღე უმთავრესი ეროვნული დღესასწაულია. მნიშვნელოვანია, თითოეულმა ჩვენგანმა საკუთარი წვლილი შევიტანოთ ამ დღის სათანადოდ აღნიშვნაში – საკუთარი სახლის ფანჯრებიდან, აივნებიდან გადმოვფინოთ ან აღვმართოთ სახელმწიფო დროშა და ამ გზით საკადრისი პატივი მივაგოთ სახელმწიფო დამოუკიდებლობის, ერთიანობისა და მომავლისკენ სწრაფვის სიმბოლოს.
სამწუხაროდ, დღემდე დროშა აღიქმება, როგორც დემონსტრაციებისა და გამოსვლების სიმბოლოდ. ჩვენი, საქართველოს მოქალაქეების ჩართულობით კი, ეს დღე უნდა იქცეს ეროვნულ, სახალხო დღესასწაულად, როგორც ეს ევროპულ, დემოკრატიულ სახელმწიფოს შეეფერება. აღსანიშნავია, რომ საშემოდგომო სესიაზე, საქართველოს პარლამენტმა აქტიურად იმუშავა სახელმწიფო მნიშვნელობის სიმბოლოების შექმნასთან, დამტკიცებასა და გამოყენებასთან დაკავშირებით ერთიანი სამართლებრივი მექანიზმის შექმნაზე და დღეს არსებული საკანონმდებლო ხარვეზების აღმოფხვრაზე. კიდევ ერთხელ მინდა, ვთხოვო ყველას შევუერთდეთ საქართველოს ჰერალდიკის სახელმწიფო საბჭოს მოწოდებას, სახელმწიფო დროში გამოფენასთან დაკავშირებით და ვაქციოთ ეს დღე ნამდვილ ეროვნულ, სახალხო დღესასწაულად“, – აცხადებს ვანო ზარდიაშვილი.