მედიაში გავრცელდა ინფორმაცია, რომ მსახიობი ნატა გულიაშვილი პოლიტიკაში მიდის და ის, თაკო ჩარკვიანის პარტიის “კანონი და სამართალი” წევრი გახდა.
გულიაშვილი პარტიის ყრილობასაც ესწრებოდა, სადაც განაცხადა:
„ეროვნული მოძრაობა იქნება და ძალიან მომწონს. ბევრ კარგ საქმეს გავაკეთებთ ერთად, ამის მჯერა. ბევრი მიზეზია, რის გამოც პოლიტიკაში მოსვლა გადავწყვიტე. ძალიან ბევრი უსამართლობა ხდება და მინდა, ეს უსამართლობა აღმოიფხვრას. უსამართლობას ვებრძვი და ეს არის მიზეზი. მე რა კუთხით ვიმუშავებ, ამაზე ცოტა მოგვიანებით ვისაუბრებ“, – განაცხადა ნატა გულიაშვილმა.
ამასთან, მსახიობი “ფეისბუქის” პირად გვერდზე აქტიურად აზიარებს მის პოლიტიკურ განცხადებებს, რომელიც მედიასაშუალებებით გავრცელდა.
ნატა გულიაშვილთან დაკავშირებულ ინფორმაციას, თავად პარტიის “კანონი და სამართალი” ლიდერი გამოეხმაურა, რომელმა სოციალურ ქსელში დაწერა:
“მსახიობ ნატა გულიაშვილის გამო მირეკავენ (ზოგადად ამ ადამიანის საწინააღმდეგო არავის, არაფერი გვაქვს, მითუმეტეს მე), უბრალოდ გეტყვით, რომ ნატა, ჩვენი გუნდის წევრი არ არის, ის გუნდის წევრი არ არის, გუნდი წარმოვადგინეთ ყრილობაზე, პარტიაში გაწევრიანების უფლება კი ყველა მოქალაქეს აქვს, კონსტიტუციური უფლებაა. რატომ ლანძღავს ზოგიერთი” ამ ადამიანს- გაუგებარია, თუმცა ყანდურ- ყანდიაშვილის ტროლები, სულ გადამავიწყდნენ რუსთაველის 12 ნომრიდან. მე კი, ნამდვილად მესმის ყანდიაშვილ- ფოფხაძის ბანდის, რატომ შეწუხდნენ?! სწორადაც, რადგან მათ კი უნდა ეშინოდეთ -”კანონი და სამართლის” , – დაწერა ჩარკვიანმა.
თაკო ჩარკვიანის აღნიშნულ განცხადებას, “ფეისბუქის” პირად გვერდზე, ჟურნალისტი დარეჯან მეფარიშვილი სატირული რეპლიკით გამოეხმაურა: – “გათენებამდე უარჰყო.”
თაკო ჩარკვიანის პოლიტიკური გაერთიანების „კანონი და სამართალი“ დამფუძნებელი ყრილობა „ექსპო ჯორჯიაში“ მიმდინარეობს. ყრილობას ესწრებიან „ნაციონალური მოძრაობისა“ და „ევროპული საქართველოს“ წარმომადგენლებიც.