„ევროპული საქართველო“ ღია პლატფორმაა და ბუნებრივია, მას კონსულტაციები აქვს პროევროპულ, ღირებულებით ახლოს მყოფ პარტიებთან, მათ შორის „თავისუფალ დემოკრატებთან“, – განაცხადა პარტია „ევროპული საქართველოს“ გენერალურმა მდივანმა, გიგი უგულავამ პირველი არხის გადაცემაში „კვირის ინტერვიუ“ სტუმრობისას.
„მიუხედავად იმისა, რომ ჩვენი პარტიის ძირითადი უმრავლესობა, ისევე, როგორც მათი პარტიის ძირითადი უმრავლესობა, ასე ვთქვათ, სხვადასხვა წარსულიდან, ანუ სხვადასხვა ნაპირიდან მოვდივართ, ეს ჩვენს პოტენციურ თანამშრომლობას კიდევ უფრო მეტ მიმზიდველობას სძენს. არ დაგიმალავთ და გულწრფელად ვიტყვი – დღეს ჩემი პარტიის ერთ-ერთ მთავარ გამოწვევად მიმაჩნია, რომ ჩვენ მაინც ერთი მდინარიდან წამოსული ხალხი ვართ. ჩვენ ვართ ყოფილი თანამდებობის პირები და გვჭირდება მდინარის სხვა ნაპირიდან მოსული ადამიანები“, – განაცხადა უგულავამ.
მისი თქმით, მაჟორიტარებისა და მერების არჩევნებზე „ევროპულ საქართველოს“ კოორდინაცია აქვს სხვა პროევროპულ პოლიტიკურ ძალებთან და მათ შორის, „ნაციონალურ მოძრაობასთან“.
გადაცემის წამყვანის შეკითხვაზე, როგორ უნდა გაარჩიოს საზოგადოებამ ისინი ერთმანეთისგან და სად უნდა დაინახოს მათ შორის სხვაობა, თუ „ნაციონალურ მოძრაობასა“ და „ევროპულ საქართველოს“ საპარლამენტო არჩევნებზე ერთიანი კანდიდატები ეყოლებათ, გიგი უგულავამ განაცხადა, რომ მათ ღირებულებითი სხვაობა აქვთ, მაგრამ ერთმანეთს არ უნდა აგინონ და გაშორებული ცოლ-ქმარივით არ უნდა ეურთიერთონ.