სასამართლოსთან დაკავშირებული პროვოკაცია საკონსტიტუციო სასამართლოს თავმჯდომარე გიორგი პაპუაშვილმა მას შემდეგ წამოიწყო, რაც „ნაციონალური მოძრაობის“ მიზანი საპარლამენტო არჩევნების ჩაშლასთან დაკავშირებით ვერ განხორციელდა.
ამის შესახებ „კვირას“ პრესკლუბში გამართულ პრესკონფერენციაზე საპარლამენტო უმრავლესობის წევრმა, „სოციალ-დემოკრატების“ ლიდერმა გია ჟორჟოლიანმა განაცხადა.
„ეს ყველაფერი მოჰყვა საკონსტიტუციო სასამართლოს გადაწყვეტილებას, რომელიც ეხებოდა „ნაციონალური მოძრაობის“ სარჩელს საარჩევნო კანონის გაუქმების თაობაზე. პარლამენტში მივიღეთ საარჩევნო კანონი, რომელიც სრულად ადეკვატური იყო საკონსტიტუციო სასამართლოს გადაწყვეტილების. იმის მიუხედავად, რომ საკონსტიტუციო სასამართლოს თავის გადაწყვეტილებაში არაზუსტად ჰქონდა ციტირებული ვენეციის კომისიის რეკომენდაცია, ჩვენ მაინც გავიზიარეთ, რათა საკონსტიუტუციო სასამართლოს გადაწყვეტილებასთან რაიმე დისონანსში არ მოსულიყო პარლამენტის გადაწყვეტილება. ამის შემდეგ, ლოგიკის თვალსაზრისით საოცარი იყო „ნაციონალური მოძრაობის სარჩელი ამ კანონის გაუქმების თაობაზე, მაგრამ ნათელია, რომ მათი მიზანი პროვოკაცია და არჩევნების ჩაშლა იყო და ვერ მოახერხეს ზეგავლენის მოხდენა ყველა მოსამართლეზე. ამის გამო, ახალი პროვოკაცია დაიწყეს. ვითომ იმ მოსამართლეებზე, რომლებმაც გონივრულ და სახელმწიფოებრივ გადაწყვეტილებას დაუჭირეს მხარი, დაიწყეს საუბარი, თითქოს ზეწოლას განიცდიან. სინამდვილეში კი ყველაფერი პირიქით არის. რასაც საკონსტიტუციო სასამართლოს თავმჯდომარე და ზოგიერთი მოსამართლე აკეთებს,“-განაცხადა გია ჟორჟოლიანმა.
მისივე თქმით, ზოგიერთმა მოსამართლემ და სასამართლოსთან დაკავშირებულმა პირმა, ვისაც მიხეილ სააკაშვილის რეჟიმის სასამართლოში მუშაობის გამოცდილება აქვს, ვერ წარმოუდგენიათ, რომ ხელისუფლება არ ახორციელებდეს ზეწოლას მოსამართლეებზე.
„ზოგიერთი მათგანი ახლაც განიცდის ზეწოლას, ერთ-ერთი პოლიტიკური სუბიექტის, „ნაციონალური მოძრაობისგან“ და ვერ წარმოუდგენიათ, რომ ხელისუფლება ზეწოლას არ ახორციელებდეს. სინამდვილეში, რასაკვირველია ხელისუფლება სასამართლოზე ზეწოლას არ ახორციელებს“,-განაცხადა გია ჟორჟოლიანმა.