“მაქსიმალურად შეიზღუდება არასრულწლოვნების წვდომა ცივ იარაღზე”

„მიმდინარე წელს, ჩვენ, სხვადასხვა საგამოძიებო და საპროცესო მოქმედების ჩატარების შედეგად, ასობით ცივი იარაღი გვაქვს ამოღებული“, – ამის შესახებ შინაგან საქმეთა სამინისტროს მოადგილემ, ნათია მეზვრიშვილმა ცივ იარაღთან დაკავშირებით ახლი კანონის შესახებ საუბრისას განაცხადა.
მისი თქმით, ამ კანონპროექტის უპირველესი მიზანია ცივ იარაღზე არასრულწლოვნების ხელმისაწვდომობის შეზღუდვა. შს მინისტრის მოადგილის განცხადებით, ცივი იარაღი ყველგან იყიდება, მათ შორის – სკოლების ტერიტორიაზე, რაც, მისი თქმით, არასრულწლოვნებისთვის მარტივად ხელმისაწვდომს ხდის.
„ცივ იარაღთან დაკავშირებით რამდენიმე ფაქტორი იყო, რომლის გამოც საკანონმდებლო ცვლილებების ინიცირება გადავწყვიტეთ. ძალიან მნიშვნელოვანი საკანონმდებლო პაკეტია, რომელსაც დღეს მთავრობამ მხარი დაუჭირა და იმედია, რომ პარლამენტიც მხარს დაუჭერს. მიზანი გახლავთ საზოგადოებრივი უსაფრთხოების კიდევ უფრო მეტად უზრუნველყოფა და ამ დანაშაულის წინააღმდეგ ბრძოლის კიდევ უფრო გააქტიურება. პრაქტიკაში პოლიცია არის მეტად აქტიური ცივი იარაღების ტარების გამოვლენის კუთხით. მაგალითად, მიმდინარე წელს, ჩვენ, სხვადასხვა საგამოძიებო და საპროცესო მოქმედების ჩატარების შედეგად, ასობით ცივი იარაღი გვაქვს ამოღებული. გარდა ამისა, ეს გახლდათ საზოგადოების მოთხოვნა, რაზეც არაერთხელ ყოფილა საუბარი. ჩვენ ეს მოთხოვნა გავითვალისწინეთ. გამოვლენის მხრივ აქტიურობასთან ერთად, გადავწყვიტეთ, ის ვაკუუმი შეგვევსო, რაც საკანონმდებლო დონეზე არსებობს, განსაკუთრებით ცივი იარაღით ვაჭრობის მიმართულებით, გაყიდვის მიმართულებით. დღეს კანონით ისჯება ტარება როგორც ადმინისტრაციული წესით, ისე – სისხლის სამართლის წესით, მაგრამ გაყიდვის საკითხები სათანადოდ არ არის დარეგულირებული, რის გამოც ცივი იარაღი არის ადვილად ხელმისაწვდომი არასრულწლოვნებისთვის. ამიტომ ამ კანონპროექტის უპირველესი მიზანი გახლავთ ცივ იარაღზე არასრულწლოვნების ხელმისაწვდომობის შეზღუდვა იმიტომ, რომ დღეს გაყიდვა შეუძლია ყველას და ამასთანავე ცივი იარაღი იყიდება ყველგან, მათ შორის – სკოლების ტერიტორიაზე, რაც, ბუნებრივია, არასრულწლოვნებისთვის მარტივად ხელმისაწვდომს ხდის მას. ახალი კანონი გაყიდვის საკითხებს არეგულირებს, აკრძალავს ცივი იარაღის გაყიდვას არასრულწლოვანზე, ასევე, გარკვეულ რისკჯგუფებზე, მათ შორის, მაგალითად, ნასამართლევ პირებზე. მეორე მნიშვნელოვანი კომპონენტი ამ კანონპროექტისა არის ის, რომ ტარებისთვის მკაცრდება როგორც ადმინისტრაციული, ისე – სისხლისსამართლებრივი სანქციები. ბუნებრივია, საკანონმდებლო ცვლილებები გაყიდვის ნაწილში არ ეხება საოჯახო და საყოფაცხოვრებო დანიშნულების დანებს. კიდევ ერთი მნიშვნელოვანი საკითხი, რომელიც ამას უკავშირდება – რა თქმა უნდა, ეს საკანონმდებლო ცვლილებები არ ნიშნავს იმას, რომ დანებით დანაშაულის ჩადენის აბსოლუტური პრევენცია მოხდება. ეს საკანონმდებლო ცვლილებები, უბრალოდ, ნიშნავს იმას, რომ მაქსიმალურად შეიზღუდება წვდომა ცივ იარაღზე, განსაკუთრებით – არასრულწლოვნების ნაწილში“, – განაცხადა ნათია მეზვრიშვილმა.