9 წლის ნანიკო ბერიაშვილის მკვლელობის საქმის განხილვა დასკვნით ეტაპზეა. დღევანდელ პროცესზე ბრალდების სამი მოწმე გამოკითხეს, მათ შორის ექსპერტები.
პროკურორის განმარტებით, ექსპერტებმა დეტალურად აღწერეს გარდაცვლილისთვის მიყენებული დაზიანებები, რამაც ბავშვის სიკვდილი გამოიწვია. მომდევნო პროცესი ბრალდების მხარის წერილობითი მტკიცებულებების გამოკვლევით განახლდება, რის შემდეგაც ბრალდებული იაგო ნებიერიძე სასამართლოს ჩვენებას მისცემს. ის ბრალს ამ დრომდე არ აღიარებს.
მოზარდი გასული წლის 25 ოქტომბერს მდინარე ლიახვის ნაპირას მოკლული იპოვეს. შინაგან საქმეთა სამინისტრომ მკვლელობის ბრალდებით წარსულში ნასამართლევი 33 წლის იაგო ნებიერიძე არასრულწლოვნის მიმართ დამამძიმებელ გარემოებაში ჩადენილი განზრახ მკვლელობის მუხლით დააკავა, რამდენიმე დღეში კი, ბრალი დაუმძიმდა სისხლის სამართლის კოდექსის 141-ე მუხლით, რაც გარყვნილ ქმედებას გულისხმობს.