ბათუმის საკრებულოს რიგგარეშე სხდომა გუშინდელი დაკავებების შესახებ განცხადებით დაიწყო. „ნაციონალური მოძრაობა“ მმართველ გუნდს მოუწოდებს პოლიტიკური პასუხისმგებლობა აიღოს საკუთარ თავზე. მირდატ ქამადაძე თავდებში უდგება დაკავებულების იმ ნაწილს, რომლებიც იმ პერიოდში რიგითი საჯარო მოხელეები იყვნენ.
„ფუკასავით აგვაცალეს მთელ მერია ცხვირწინ. ბათუმელები არ იმსახურებდნენ ამას. აიღეთ პოლიტიკური პასუხისმგებლობა საკუთარ თავზე. მე, საკრებულოს წევრი ხმამაღლა ვაცხადებ, რომ პირადად ვიღებ ამ ადამიანებზე ვალდებულებას და ვუდგები ნაწილს თავდებად“, – განაცხადა მირდატ ქამადაძემ.
როგორც საკრებულოს თავმჯდომარემ განმარტა, გამოძიება მიმდინარეობს და წინასწარ ვინმეს უდანაშაულობაზე საუბარი უხერხულია.
„ვინ არის დამნაშავე ან უდანაშაულო დაველოდოთ გამოძიებას. მადლობა ღმერთს დადგა დრო, რომ ხელისუფლებაში არიან ადამიანები, რომელთათვის კანონი უზენაესია და ერთი და ორი ადამიანის ხუშტურებით არ იმართება ქვეყანა“, – განაცხადა სულიკო თებიძემ
აჭარაში დაკავებულ მოქმედ და ყოფილ მაღალჩინოსნებს ბრალს დღეს წარუდგენენ. საუბარია კორუფციულ გარიგებაზე, რომლის შედეგად, პროკურატურის ცნობით, სახელმწიფომ მილიონ სამასი ათასზე მეტი ლარი იზარალა.
აჭარაში, საქართველოს პროკურატურის და ფინანსთა სამინისტროს საგამოძიებო სამსახურის ერთობლივი მუშაობის შედეგად, სამსახურეობრივი მდგომარეობის გამოყენებით, დიდი ოდენობით სახელმწიფოს კუთვნილი ფულადი თანხის მართლსაწინააღმდეგო გაფლანგვის და სამსახურებრივი მდგომარეობის ბოროტად გამოყენების ფაქტებზე 7 მაღალჩინოსანი დააკავეს.