პარტია ”თავისუფალი დემოკრატების” წევრი გია ცაგარეიშვილი ”ქართული ოცნება – დემოკრატიული საქართველოს” აღმასრულებელი მდივნის ირაკლი კობახიძისა და მისი მეგობრების ”ისტორიის სანაგვეზე გასტუმრების” პირობას დებს.
გია ცაგარეიშვილის შეფასებით, საზოგადოება მმართველი პარტიის აღმასრულებელი მდივნისგან ბევრად უფრო სერიოზულ განცხადებებს უნდა ისმენდეს.
”კაცს, რომელსაც საპარლამენტო უმრავლესობაში 12 გავარვარებული ”ნაციონალი” ჰყავს და ამაზე სინდისის ქენჯნა არასდროს ჰქონია, ჩემსკენ და ჩემი თანაპარტიელებისკენ იშვერდეს ხელს და გვადანაშაულებდეს სააკაშვილის სატელოტობაში, ფრიად არასერიოზული განცხადებაა. ახალგაზრდა კაცია და მე ნამდვილად მენანება იმისთვის, რომ ამგვარად არასერიოზულად წარმოჩნდეს საზოგადოების წინაშე. კობახიძე ჯერ კიდევ მგონი სკოლაში სწავლობდა, მე რომ სააკაშვილის სატელიტობას მაბრალებდნენ. სააკაშვილი ოდესაში გავისტუმრე და გარწმუნებთ, კობახიძეს და მის მეგობრებსაც გავისტუმრებ ძალიან მალე არა ოდესაში, არამედ ისტორიის სანაგვეზე. ამას აუცილებლად გპირდებით, აუცილებლად გავიმარჯვებთ არჩევნებში. ერთადერთი, ვისაც მეგობრობის ხელს გავუწვდით, ჩვენი საზოგადოება და ქართველი ხალხი იქნება”, – აღნიშნა გიორგი ცაგარეიშვილმა.