რუსეთის უსაფრთხოების ფედერალურმა სამსახურმა (ФСБ) მოსკოვში, მუზეუმ „სობრანიეში“ ჩხრეკა ჩაატარა. ამ მუზეუმის მეპატრონე ცნობილი ქართველი ბიზნესმენი დავით იაკობაშვილია. ამის შესახებ ინფორმაციას BBC ავრცელებს.
ჩხრეკა კორუფციული საქმის ფარგლებში ჩატარდა, რომლის ფიგურანტებიც ამ ეტაპზე არ სახელდება
ერთი ვერსიით, საქმეზე გამოძიება იაკობაშვილის ყოფილი პარტნიორის, ბორის მინახის საჩივრის საფუძველზე დაიწყო, რომელიც მათ საერთო ბიზნესში სახსრების მითვისებაში ადანაშაულებს.
თავად იაკობაშვილი კომენტარზე უარს აცხადებს.
დავით იაკობაშვილი კერძო ინვესტორია. ის თბილისში 1957 წელს დაიბადა. Forbs-ის რუსულ რეიტინგში ის 145-ე ადგილს იკავებს. მისი ქონება750 მილიონ დოლარად ფასდება.
ყველაზე მსხვილი წილი – 51%-ის ოდენობით მას ნავთობტრეიდერ Petrocas Energy Holding-ში აქვს. გასულ წელს მან 10 მილიონით Telegram-ი დააფინანსა
რაც შეეხება საქართველოში მის ბიზნესინტერესებს და კავშირებს:
წლების განმავლობაში ის ასლან აბაშიძის ახლო მეგობრად მიიჩნეოდა. მოგვიანებით, ნაციონალური მოძრაობის ხელისუფლებაში ყოფნის დროს, ის დავით კეზერაშვილის ბიზნესპარტნიორად მოგვევლინა. ეს კავშირი მას არასდროს უარყვია. მოგვიანებით, როცა ქართულ ბიზნესს კეზერაშვილი ოფიციალურად „ჩაეხსნა“, ვრცელდებოდა ინფორმაციები, რომ მისი წილები სწორედ იაკობაშვილმა გადაიბარა. შესაბამისად მისი აქტივების ნუსხაში აღმოჩნდა:
Petrocas Energy Group-ი, რომელიც 140 ბენზინგასამართ სადგურს ფლობს ამიერკავკასიასა და ყაზახეთში, ასევე ორ ნავთობგადამამუშავებელ ტერმინალს ფოთსა და ბათუმში. ასევე არსებობს ინფორმაცია, რომ მის მფლობელობაშია სარეკლამო კომპანია Outdoor.ge, შაქრის მწარმოებელი კომპანია და კაზინო აჭარა.