„მომხდარზე, რასაკვირველია, პირველ რიგში პასუხისმგებლობა ეკისრება ხელისუფლებას, იმ მოვლენების გამო, რამაც ხალხი საპროტესტოდ ქუჩაში გაიყვანა, იმის გამო, რომ ვერ აღკვეთა დესტრუქციული პოლიტიკური ძალის მცდელობა, მოეწყო არეულობა (დიდი ხანია, მეორე 7 ნოემბერზე რომ ოცნებობდნენ), ვერ დაიცვა ხალხი და სამართალდამცველები დაპირისპირებისა და აგრესიისგან“, – ამის შესახებ სოციალურ ქსელში თბილისის მერიის საზოგადოებასთან ურთიერთობის სამსახურის ხელმძღვანელი მანანა თოქმაჯიშვილი წერს და შემდეგი სახის პოსტს აქვეყნებს:
„ოპოზიციის პასუხისმგებლობაზე საუბარი სასაცილოა, რადგან ის არ არის პასუხისმგებლიანი ძალა და მათთვის პასუხი ჩადენილი დანაშაულებისთვის თავის დროზე რომ მოეთხოვათ, დღეს ასეთი არაჯანსაღი პოლიტიკური გარემო არ გვექნებოდა. რაც გუშინ აქციაზე ხდებოდა, სწორედ მათი „დამსახურებით“ ცდებოდა პროტესტი გამოხატვის თავისუფლებას.
ამ დილით ჩემმა 12 წლის შვილმა კომპიუტერი ჩართო თუ არა, გაოგნებულმა ამომხედა და მკითხა: ეს რა არის, დედა? მე არ მაქვს პასუხი ამ კითხვაზე.
P.S. პოლიტიკურად ანგაჟირებულები ნუ შემომიხტებით აქ, არ ვაპირებ არავისთან პოლემიკაში შესვლას. ზუსტად ჩვენი ამ სიძულვილის და ბოღმის შედეგს ვიმკით დღეს. გვეყო“, – წერს მანანა თოქმაჯიშვილი.