“მსურს, მივმართო აქციების ორგანიზატორებს, გუშინ კიდევ ერთი შემაშფოთებელი ფაქტის წინაშე დავდექით”

“საზოგადოებრივი მაუწყებლის” ახალი და მიმდინარე ამბების ბლოკის დირექტორი, გიორგი გვიმრაძე რუსთაველის გამზირზე მიმდინარე აქციებთან დაკავშირებით განმარტებას აკეთებს. როგორც მან “ფეისბუქის” პირად გვერდზე დაწერა, “პირველი არხის” ამოცანაა, ამ აქციებთან დაკავშირებით საზოგადოებას ზუსტი და სრული ინფორმაცია მიაწოდოს, მათ შორის – ვიზუალური საშუალებით.
“მსურს, მივმართო აქციების ორგანიზატორებს. გუშინ კიდევ ერთი შემაშფოთებელი ფაქტის წინაშე დავდექით. აქციის ერთ-ერთი მონაწილე ჩვენს ოპერატორს სთხოვდა განმარტებას კადრთან დაკავშირებით – საკმაოდ უხეშად და შეურაცხმყოფელად.
პირველი – განმარტებას გავაკეთებ. “პირველი არხის” ამოცანაა, ამ აქციებთან დაკავშირებით საზოგადოებას მიაწოდოს ზუსტი და სრული ინფორმაცია, მათ შორის – ვიზუალური საშუალებით. ამ პრინციპით არის შერჩეული კადრებიც. ვისაც არ ესმის (სულაც არ არის საჭირო, რომ ესმოდეს), მათთვის განვმარტავ. აქციები გადაიცემა სამი ძირითადი კადრის გამოყენებით, მუდმივად, ანუ სამივე კადრი ერთდროულად არის პირდაპირ ეთერში. ერთი, ეს არის ახლო კადრი გამომსვლელეზე; მეორე – საერთო კადრი სცენაზე; მესამე – საერთო კადრი მოედანზე, იმ ადგილიდან, საიდანაც მოედანი შეძლებისდაგვარად სრულად ექცევა ობიექტივში. სამივე ეს კადრი ქმნის სრულ სურათს პარლამენტის წინ, რუსთაველის გამზირზე მიმდინარე მოვლენებთან დაკავშირებით (ამ შემთხვევაში არ ვახსენებ მოძრავ კამერებს, რომლებიც, ასევე, მუშაობენ ადგილზე მოვლენათა გასაშუქებლად). შესაბამისად, კიდევ ერთხელ ხაზს ვუსვამ იმას, რომ ეს კადრები იძლევა სრულ ვიზუალურ სურათს მოვლენის ადგილიდან და ასეთია სარედაქციო გადაწყვეტილება, რომელიც ეფუძნება პრინციპს – საზოგადოებას მივაწოდოთ ზუსტი, უტყუარი და სრული სურათი მოვლენის შესახებ. დიახ ეს არის საზოგადოების ინტერესი და არა დემონსტრანტების, ან დაინტერესებული ჯგუფის ინტერესი. შესაბამისად, გეუბნებით, ჩვენს ჟურნალისტებს (ამ შემთხვევაში არ ვგულისხმობ მხოლოდ რეპორტიორებს, არამედ მთელს ჯგუფს, რომლებიც მუშაობენ მოვლენის ადგილზე), რომლებიც დაშავდნენ, ზოგიერთი მათგანი საკმაოდ მძიმედ, ზუსტად ამ მოვლენების გაშუქებისას, არც გაბედოთ რომ შეეხოთ, ან თუნდაც უსაყვედუროთ, ისინი საკუთარ საქმეს ასრულებენ პირნათლად და საზოგადოების ინტერესის გათვალისწინებით. წინააღმდეგ შემთხვევაში, ჟურნალისტებისათვის ხელის შეშლისათვის მოგიწევთ პასუხისგება.
მეორე – შეგახსენებთ, რომ საზოგადოებრივი მაუწყებლის დამოუკიდებლობა კონსტიტუციით არის გარანტირებული და მის სარედაქციო დამოუკიდებლობაზე შეტევა მძიმე შედეგების მომტანი იქნება. იმის მოთხოვნა, რომ აქციები ისე გააშუქოს “პირველმა არხმა”, როგორც ეს თქვენ მოგეწონებათ. გაითვალისწინეთ, რომ სწორედ მის სარედაქციო დამოუკიდებლობაზე ზეწოლას წარმოადგენს. ამაზეც მოგიწევთ პასუხისგება.
ასე რომ, თავადაც შეიკავეთ თავი ზეწოლის მატარებელი განცხადებებისაგან და თქვენს მეგობრებსაც მოუწოდეთ, თავშეკავებით მოიქცნენ. როგორც ჩანს, ჟურნალისტების მიმართ პატივისცემას თქვენგან არ უნდა ველოდოთ, თავშეკავებას კი მოვითხოვ”, – წერს გიორგი გვიმრაძე სოციალურ ქსელში.