ტელეწამყვანი ბახვა ბრეგვაძე დიღმის ტყე-პარკის მიმდებარედ ორანჟერეას მოწყობის იდეას დადებითად აფასებს. როგორც თავად აღნიშნავს, ეს პროექტი ტყე-პარკს მეტ სიმწვანეს აჩუქებს და მოსახლეობას დროის საინტერესოდ გატარებაშიც დაეხმარება.
“ტყე-პარკში ორანჟერეას მოწყობა დიდ, გამწვანებულ სივრცეში შეტანილ პატარა, თუმცა მნიშვნელოვან გამწვანებას ნიშნავს. გადახურული, ლანდშაფტური შენობა, რომელიც რეკრეაციული ფუნქციის პარალელურად, გართობისა და დასვენების ფუნქციებისაც შეითავსებს, განსაკუთრებით საინტერესო იქნება თბილისის მაცხოვრებლებისა და ქალაქის სტუმრებისთვის. რადგანაც ორანჟერეა არ იქნება დახურული სივრცე, ჩვენ, ოჯახთან და მეგობრებთან ერთად, ნებისმიერ დროს შეგვეძლება ვესტუმროთ მას და გავატაროთ დრო ისე, როგორც თავად გვსურს. ყველაზე მოსაწონი კი ის არის, რომ მშენებლობისას ხეები არათუ მოიჭრება, არამედ 150-მდე ახალი მცენარე დაირგვება.” – აღნიშნავს ბახვა ბრეგვაძე.
შეგახსენებთ, რომ აღმაშენებლის ხეივნის მიმდებარედ, დიღმის ტყე-პარკთან მდებარე “კია მოტორსის” ავტოსალონი საგამოფენო ორანჟერეათი უნდა ჩანაცვლდეს.
პროექტი 2018 წლის სექტემბერში დამტკიცდა. პროექტის თანახმად, ავტომომსახურების ცენტრის დემონტაჟი მოხდება და მის ადგილას განთავსდება შენობა, რომლის ინტერიერი და ექსტერიერი ერთი მთლიანი ლანდშაფტური ზონა გახდება. რაც შეეხება ავტოსალონში დასაქმებულ ადამიანებს, “კია მოტორსის” ავტომომსახურების ცენტრი, რომელსაც ხსენებული ფართი ნაქირავები აქვს, ფუნქციონირებას, თანამშრომლებთან ერთად, სხვა ადგილას გააგრძელებს.
პროექტის განხორციელება არცერთი ხის მოჭრას არ გულისხმობს. მეტიც, აღნიშნულ ტერიტორიაზე დაირგვება 150-მდე ახალი, მათ შორის, ეგზოტიკური მცენარეები, რომლებიც დიღმის ტყე-პარკში არ გვხვდება. საერთო სარგებლობის ორანჟერეა მულტიფუნქციური იქნება და რეკრეაციული კომპონენტის პარალელურად, გასართობ-დასასვენებელ სივრცეებსაც მოიცავს. მოსახლეობა აქ ნებისმიერ ამინდში შეძლებს, ისეირნოს, დაისვენოს, გაერთოს და დაესწროს სხვადასხვა თეატრალურ წარმოდგენას.
პროექტის ფარგლებში, უნდა დამონტაჟდეს სარწყავი სისტემა, შენობა კი მინით გადაიხურება, რათა მცენარეებამდე მზის სხივებმა მიაღწიოს. ტერიტორიაზე გაკეთდება შადრევანი, ქვაფენილიანი ქუჩა და მოეწყობა ახალი რეკრეაციული სივრცე, ასევე ის ძველი თბილისის არქიტექტურისთვის დამახასიათებელი დეტალებით გაფორმდება.
პროექტის მიზანი ეკოლოგიური და საპარკე ინფრასტრუქტურის ერთმანეთთან ორგანულად შერწყმაა.
📽️ “ორანჟერეას” კლიპის სანახავად გადადით ბმულზე bit.ly/2WPMtRS