დიმიტრი გაბუნია – მეც მაინტერესებს, ვინ დაუდო სია პრეზიდენტს

საქართველოს პრეზიდენტის საპარლამენტო მდივნის დიმიტრი გაბუნიას განცხადებით, პატიმართა შეწყალების სიას პრეზიდენტის ადმინისტრაციის უფროსის მოადგილე ადგენს.
ამის შესახებ გაბუნიამ მედიას პარლამენტში განუცხადა.
„როგორც კი პროკურატურა გამოძიებისთვის დამიძახებს, შესაბამის განცხადებას გავაკეთებ. პრეზიდენტმა ჩემს ნაწილთან დაკავშირებით ნათლად ისაუბრა, მაგრამ მაღალი საზოგადოებრივი ინტერესიდან გამომდინარე, კითხვებს მეც ვუპასუხებ. მივესალმები პროკურატურის მიერ გამოძიების დაწყებას – როცა დამიძახებენ, მაშინვე ვითანამშრომლებ. მეც მაინტერესებს კონკრეტულად ვინ შეადგინა ეს სია და პრეზიდენტს ვინ დაუდო. კატეგორიულად მიუღებელია თითის შვერა ჩემკენ – მდივნისკენ, რომელსაც არანაირი მონაწილეობა არ მიმიღია და ამის უფლებამოსილებაც არ მაქვს. ადმინისტრაციაში არსებობს შეწყალების დეპარტამენტი, რომელსაც ჰყავს თავისი კურატორი – ადმინისტრაციის უფროსის მოადგილე. ჩემი ინფორმაციით, ის ამ სიის შედგენით თვეების განმავლობაში იყო დაკავებული. მეც თქვენთან ერთად გავიგე სახელები მედიიდან და მეც მაინტერესებს – ვინ დაუდო სია პრეზიდენტს. ველი თადუმაძის უწყებაში მისვლას. რაც შეეხება ქოიავას საქმეს – ვის დასჭირდა ჩემი სახელის გათხვრა, ეს უკვე მე მაინტერესებს და ჩემი მოთხოვნით, დამოუკიდებელი ჟურნალისტური გამოძიება მიმდინარეობს. ამ საკითხს ასე არ დავტოვებ – ოჯახის წევრები და სამეგობრო განადგურებულები ვართ. არ არის გამორიცხული პროკურატურას მივმართო, რომ გამოიძიონ. ცამდე მართალი ვარ და საზოგადოება შეცდომაშია შეყვანილი“,- განაცხადა გაბუნიამ.