მეუფე იაკობმა საკმაოდ გაუგებარი და ორაზროვანი განცხადებები გააკეთა, – ასე შეაფასა საპარლამენტო უმრავლესობის ლიდერმა, გია ვოლსკიმ მეუფე იაკობის განცხადება, რომლის მიხედვითაც გიორგი გახარია, გიორგი კვირიკაშვილი და ვახტანგ გომელაური მას პატრიარქის გადაყენებას სთავაზობდნენ.
“მძიმე ბრალდებები მედიაში, საზოგადოებასა და პოლიტიკურ ასპარეზზე ყოველდღიურ ნორმად იქცა და გამოდის, რომ მთავარმა პროკურატურამ გარკვეული საქმე ყოველდღიურად უნდა აღძრას. ადამიანები, რომლებსაც მეუფე იაკობი ასახელებს, მის მონაყოლს არ ადასტურებენ. თავად მეუფე იაკობმაც ორჭოფული განცხადება გააკეთა, რომ საუბარი ჰქონდა, მაგრამ ეს იმას არ ნიშნავს, რომ ხელისუფლებას მეუფე შიო უნდოდა და აქედან გამომდინარე, ჩანაცვლების საკითხს არ ეხებოდა. საკმაოდ გაუგებარი და ორაზროვანი განცხადებები გააკეთა. მორალურად არ განვიკითხავ, მაგრამ სამართლებრივ საკითხში პროკურატურას რჩევას ვერ მივცემ. შეიძლება, მეუფე იაკობი თავის წიაღსვლებს აკეთებს, ამბობს, ნასვამი ვიყავიო, ორჭოფულ განცხადებებს აკეთებს“, – განმარტა ვოლსკიმ.