“დიალოგის ფორმატისთვის მზად ვართ და გვჭირდება კონკრეტული პასუხი ჩვენ კომპრომისულ ვარიანტზე”

ადამ კინზინგერი მხარეებს დილოგისკენ მოუწოდებს. ამიტომაც არ დავხურეთ კარი დიალოგისთვის, ამიტომაც არის შეთავაზებული კომპრომისული ვერსია, – ამის შესახებ ჟურნალისტებს იურიდიულ საკითხთა კომიტეტის თავმჯდომარემ, ანრი ოხანაშვილმა კონგრესმენ ადამ კინზინგერის განცხადების შეფასებისას განუცხადა.
მისივე თქმით, მმართველი პარტიის კომპრომისული ვერსია ეფუძნება არა ვიწროპარტიულ ინტერესებს, არამედ ქვეყნის შემდგომ გრძელვადიან განვითარებას.
„ადამ კინზინგერის განცხადება, ვფიქრობ, არის საქართველოს სტრატეგიული მოკავშირის, კონგრესმენის გაცხადება, რომელიც მხარს უჭერს ჩვენი ქვეყნის დემოკრატიულ განვითარებას, რომლისთვისაც მნიშვნელოვანია საქართველოში დემოკრატიის შემდგომი განვითარება. მის განცხადებაში ასევე შეგვიძლია ამოვიკითხოთ ისიც, რიმ მისთვის რეგიონული უსაფრთხოების პირობებში და რეგიონის ფაქტორის გათვალისწინებით, საქართველო დემოკრატიულ განვითარებას აგრძელებს. კინზინგერის ინტერესია, განვითარება მშვიდობიანად და სტაბილურად გაგრძელდეს. ასევე ლოგიკურია მისი მოწოდებაც. ჩვენ, მმართველმა ძალამ უნდა გავაცნობიეროთ რამდენად მნიშვნელოვანია ჩვენი ქვეყნის მშვიდობიანი და სტაბილური განვითარება და ასევე, მოუწოდებს ოპოზიციას რომ ისინი უნდა იყვნენ მშვიდობიანი და სტაბილური განვითარების მომხრე”, – განაცხადა ანრი ოხანაშვილმა.
მისივე თქმით, ეს განცხადება კიდევ ერთი შეხსენებაა, რომ მხარეებმა უნდა ისაუბრონ ერთმანეთთან და ცალსახა მინიშნება იმასთან მიმართებით, რომ რეგიონის პირობებში საქართველოს დემოკრატიული განვითარება ცალსახაა და ის ამას მხარს უჭერს.
„ჩვენ ჩვენი სტრატეგიული პარტნიორების წარმომადგენლის განცხადებას გულდასმით ვეკიდებით. ბატონი კინზინგერის ეს განცხადებაც ჩვენთვის მნიშვნელოვანია. ის მოუწოდებს მხარეებს, მათ შორის ხელისუფლებას და ოპოზიციას მოლაპარაკებათა მაგიდასთან დაჯდომისთვის. ამიტომაც ჩვენ არ დავხურეთ კარი დიალოგისთვის, ამიტომაც არის შეთავაზებული კომპრომისული ვერსია. ეს ჩვენი ვერსია ეფუძნება არა ვიწროპარტიულ ინტერესებს, არამედ ჩვენი ქვეყნის შემდგომ გრძელვადიან განვითარებას და თუ ოპოზიციაც ამ ყველაფერს უყურებს ჩვენი ქვეყნის განვითარების პეტრპექტივით, მათ უნდა დაუჭირონ მხარი ამ შეთავაზებას. ჩვენ გაკეთებული გვაქვს შეთავაზება 100/50-ზე. ჩვენ დიალოგის ფორმატისთვის მზად ვართ. გვჭირდება კონკრეტული პასუხი ჩვენ კომპრომისულ ვარიანტზე. ჯერ არ გვაქვს არგუმენტირებული პასუხი. ჯერი არის მათზე”, – განაცხადა ოხანაშვილმა.
“აუცილებელია, რომ საქართველოში ყველა დაინტერესებული, მონაწილე მხარე წავიდეს კომპრომისზე, რათა მიღწეული იყოს მათი მიზანი დემოკრატიასა და თავისუფლებასთან დაკავშირებით, – ამის შესახებ კონგრესმენი ადამ კინზინგერი „ტვიტერის“ საკუთარ გვერდზე პოსტს აქვეყნებს და საქართველოს პარლამენტის თავმჯდომარესთან გამართულ შეხვედრას ეხმაურება, რომელიც აშშ-ში არჩილ თალაკვაძის სამუშაო ვიზიტის ფარგლებში გაიმართა.