“პანიკა არ არის საჭირო – ისედაც ბევრი პრობლემაა და ამ საფრთხეს პროვოკაციული მიზნებისთვის ნუ გამოვიყენებთ“

პოეტი, მთარგმნელი და მუსიკოსი, ირინე გოჩაშვილი კორონავირუსთან დაკავშირებით “ფეისბუქზე” სტატუსს აქვეყნებს.
„როდესაც ქვეყანაში ისეთი პრობლემა დგას, რომელიც ადამიანთა ჯანმრთელობას ეხება, ვფიქრობ, ჩვენი პოლიტიკური შეხედულებები არსებულ პრობლემაზე მაღლა არ უნდა დავაყენოთ!
ყველა უნდა გავერთიანდეთ, რათა ეს საფრთხე თავიდან ავიცილოთ!
ჰიპოკრატეს ფიცის თანახმად, ექიმი ვალდებულია, ნებისმიერი პაციენტის ჯანმრთელობაზე იზრუნოს.
მე ისეთ ოჯახში გავიზარდე, სადაც  მედიცინის რამდენიმე  თავგანწირული წარმომადგენელი იღვწოდა. საკმარისია, დავასახელო ჩემი ბებია (ქრისტინე თედიაშვილი, საქართველოს დამსახურებული ექიმი), რომელიც იმჟამინდელი სამხრეთ ოსეთის მთავარი პედიატრი გახლდათ. ღამეში ორ – სამ საათზე მეტი არ ეძინა, რადგან ძალიან ხშირად უწევდა პაციენტების გადარჩენაზე ზრუნვა.
ჩემი დეიდა – ცნობილი ნეონატოლოგი, მედიცინის მეცნიერებათა დოქტორი, ია დავითაია ამ თავგანწირულ ექიმთა რიგებში დგას.
ტელევიზიით გამოცხადებული გაფრთხილებანი უსათუოდ უნდა გავითვალისწინოთ, პატივი უნდა ვცეთ ერთმანეთის ჯანმრთელობას, გვერდზე გადავდოთ ჩვენი ამბიციური და განსხვავებული შეხედულებები.
არ არის საჭირო პანიკა – ჩვენს ქვეყანაში ისედაც ბევრი პრობლემაა და ამ საფრთხეს პროვოკაციული მიზნებისათვის ნუ გამოვიყენებთ“, – წერს ირინე გოჩაშვილი.