“ოპოზიციას მოვუწოდებდი, დავანებოთ თავი „ქართული ოცნების“ მანიპულაციების დევნას, დავივიწყოთ ეს პროცესი, მოვემზადოთ ნებისმიერი არჩევნებისთვის”, – ამის შესახებ პარტია „გირჩის“ ერთ-ერთმა ლიდერმა, იაგო ხვიჩიამ მედიაჰოლდინგ „კვირას“ პრესკლუბში გამართულ პრესკონფერენციაზე განაცხადა.
ხვიჩიამ საარჩევნო სისტემის საკითხთან დაკავშირებით ისაუბრა და აღნიშნა, რომ ხელისუფლებას, რეალურად, არანაირი შეთანხმების მიღწევა არ სურს.
„მე ოპოზიციას მოვუწოდებდი, დავანებოთ თავი „ქართული ოცნების“ მანიპულაციებზე დევნას, დავივიწყოთ ეს პროცესი, მოვემზადოთ ნებისმიერი არჩევნებისთვის. თუ „ქართული ოცნებისთვის“ ექნება მნიშვნელობა, როგორ ჩაატარებს არჩევნებს, ის ყოველთვის ეცდება იმას, რომ არჩევნები ჩაატაროს ისე, როგორც ეს მას წარმოუდგენია მისი გამარჯვებისთვის სწორად. „ქართულ ოცნებას“ აწყობს, ოპოზიციამ არ გააგრძელოს სერიოზული ლაპარაკი იმ თემებზე, რომელიც არსებობს ქვეყანაში და რომელიც პასუხობს კითხვას, თუ რა იქნება ბიძინა ივანიშვილის შემდეგ. ახლა ოპოზიცია ამაზე არ ლაპარაკობს, ამ წუთას ოპოზიცია ლაპარაკობს იმაზე, რა პროპორციულ ვარიანტზე შეუთანხმდეს ხელისუფლებას. მაგრამ ხელისუფლებას არ უნდა შეთანხმებების მიღწევა. ამიტომ გამოსავალი ძალიან მარტივია: უნდა გავანებოთ თავი „ქართულ ოცნებასთან“ ამ სახის საუბარს , რომელსაც შედეგი არ მოჰყვება”, – განაცხადა იაგო ხვიჩიამ.