თამარ ბაჩალიაშვილის ოჯახის ადვოკატი გარდაცვლილის მამის დაზარალებულის უფლებამონაცვლედ ცნობას და საქმის კვალიფიკაციის შეცვლას ითხოვს. მიხეილ რამიშვილი თვლის, რომ გამოძიება თვითმკვლელობამდე მიყვანის მუხლით უნდა წარიმართოს. უფლებადამცველი საქმის მასალებს ითხოვს, რომლის მისაღებადაც საგამოძიებო უწყებას დღეს კიდევ ერთხელ მიმართავს.
“ჩვენი მთავარი მოთხოვნაა, რომ დაზარალებულის უფლებამონაცვლედ იყოს ცნობილი მამა და, გარდა ამისა, საქმის მასალებს გავეცნო და გადმომეცეს ის, რაც საჭიროა, რათა დეტალურად ვიყო ინფორმირებული.
თავიდან, გასაგებია, რადგან ადამიანი იყო გამქრალი, ძებნა მიმდინარეობდა და იმ მუხლით წავიდა. ავტომობილით იყო წასული არეალიდან, მიმდინარეობდა მისი ძებნა, შესაბამისად, თავისუფლების უკანონო აღკვეთაზე იყო საუბარი. მაგრამ, დღეს აღმოჩენილია მისი ცხედარი, შესაბამისად, უნდა დადასტურდეს, გამოიძიონ მისი მკვლელობა მოხდა თუ რა მოხდა, მის სიცოცხლეს რითი დაემუქრა საფრთხე.
თვითმკვლელობა არ ნიშნავს, რომ ამის გამო არ შეიძლება ვინმე დაისაჯოს, მკვლელობა არ ნიშნავს, რომ მაინცდამაინც ადამიანმა უნდა მოგკლას, ამის უკან შეიძლება გარემოება არსებობდეს, პირები არსებობდეს,“- განაცხადა ადვოკატმა.
თამარ ბაჩალიაშვილის შესაძლო თვითმკვლელობის ვერსიას მისი ოჯახი კატეგორიულად უარყოფს.
“ჩვენ თავიდანვე გვინდოდა, რომ დაზარალებულად ვეცნეთ და ახლა ადვოკატიც იბრძვის იმისთვის, რომ ოჯახის მამას დაზარალებულის სტატუსი მიანიჭონ. აფთიაქი არსებობს იმისთვის, რომ მედიკამენტი შეიძინოს ზოგადად. ჩვენ არ ვიცით, რა მედიკამენტი შეიძინა. თქვენ ყველას კარგად მოგეხსენებათ, რომ ფსიქოტროპიული მედიკამენტების გაცემა აუცილებლად რეცეპტით ხდება. თამუნას არ ჭირდა ისეთი არაფერი. გოგონა, რომელიც არის ძალიან წარმატებული, მუშაობს მაღალანაზღაურებად სამსახურში, თუნდაც აქვს მართვის მოწმობა და ატარებს მანქანას, არა მგონია, იმას რამე დამამძიმებელი პრეპარატები შეეძინა,“- აცხადებს თამარ ბაჩალიაშვილის ბიძა.