„ამ რუკის შესაბამისად, ჩვენ გადავდივართ 1929 წლის შეთანხმების სამართლებრივ ველში და მაშინ დავკარგავთ დავით გარეჯის ნაწილს იმიტომ, რომ იმ შეთანხმებაში სიტყვიერად წერია: საზღვარი გადის ჩიჩხიტურის კოშკზე”, – განაცხადა ილიჩოვამ.
მამუკა არეშიძე აცხადებს, რომ მას ნანახი აქვს 1:200 000-იანი მასშტაბის რუკის ასლი. არეშიძის თქმით, ამ რუკის მიხედვით, უდაბნო, ჩიჩხიტური ცალსახად საქართველოს ტერიტორიაზეა.
„1:200 000 მასშტაბის რუკის ბაზაზე შედგა 1:500 000 -იანი რუკა. 1:500 000-იანი ზოგადია. 1:200 000 მასშტაბის რუკა კონკრეტულია. თუ რაღაც ხარვეზი იყო, რატომ აიღეს მაშინ 1:500 000-იანი რუკა თავის დროზე? თუ 1929 წლის ხელშეკრულების რეანიმაცია მოხდება 1:200 000-იანი რუკით, მაშინ 1:500 000-იანითაც მოხდება. მე არასდროს მითქვამს, რომ რუკა არასწორადაა აღებული. რუკა სწორადაა აღებული, მაგრამ მასშტაბია არასწორად აღებული. ამაშია საქმე.
მე ნანახი მაქვს 1:200 000 მასშტაბიანი რუკის ასლი. უდაბნო, ჩიჩხიტური ცალსახად არის საქართველოს ტერიტორიაზე.
ეს სპეკულაციები, პოლიტიკური კინკლაობა უკვე მოსაბეზრებელი გახდა. არავინ ამბობს, რომ მაინცდამაინც ივერი მელაშვილი და ნატალია ილიჩოვა არიან ამ ყველაფერში დამნაშავეები. ჩემი აზრით, მელაშვილის დანაშაული იმაში მდგომარეობას, რომ აჩემებული აქვს, გინდა თუ არა, ჩვენი პოლიტიკა სწორი იყოო. არ იყო სწორი.
რასაკვირველია, რუსეთის მიერაა ეს რუკები არეულ-დარეული, მაგრამ აქ ახლა ცოტა სხვა რამეზეა ლაპარაკი. გავიგეთ რუსეთი. . . 99 % რუსეთის ბრალია, მაგრამ 1% ხომ არის ქართველების ბრალი? წინა ხელისუფლების, იმის წინა ხელისუფლების, ვიღაც დაბალი დონის ჩინოვნიკებისა და ა.შ. სირცხვილია იმაზე ლაპარაკი, რომ თვე-ნახევრის წინ გაახსენდათ ეს ამბავი. ეს ბევრ ადამიანს აყენებს შეურაცხყოფას, მათ შორის – მეც, რომელიც 6 წელია, ამ რუკებისა და დოკუმენტების გამო ვცდილობ, რაღაც კედელი გავარღვიო. ან ჩვენი სამღვდელოება: ევროკავშირში იყვნენ, ნატო-ს შტაბბინაში ჩავიდნენ ამისთვის, აზერბაიჯანთან ეს სიტუაცია გაგვირკვიეთო, ეუთო-ს მისიაშიც იყვნენ, სად არ იყვნენ, მოიარეს მთელი ევროპა და დღეს ეუბნებიან, თვე-ნახევრის წინ რატომ დაიწყეთ ლაპარაკიო. მამა კირიონს ვგულისხმობ და კიდევ სხვა სამღვდელოებას. არ შეიძლება ასე მოქცევა და ლაპარაკი. პოლიტიკურ მიზნებს არ უნდა გადააყოლო ყველაფერი. მესმის, რომ „ქართულმა ოცნებამ“ ეს საარჩევნოდ გამოიყენა, თავად რომ ყოფილიყვნენ, არ გამოიყენებდნენ? ყველა გამოიყენებდა. რეალობა ასეთია. პოლიტიკა ასეთი რამაა, სამწუხაროდ, თუმცა, ობიექტურად უნდა ითქვას, რომ ეს დროში ერთმანეთს დაემთხვა.
კომისიის იქეთა მხარეს ეს დოკუმენტები აქვს და ეცნობიან. თუ ეს დოკუმენტები არაფერში გამოდგებოდა, როგორც ახლა ზოგიერთი ამბობს, მაშინ რატომ იყო გამქრალი? მე ხომ ჩემი თვალით მაქვს ნანახი, ზოგიერთ ქართულ არქივში აღწერაში არის ეს დოკუმენტი, რეალურად კი არ იყო. რატომ იყო გამქრალი? ეს ხომ, ბუნებრივია, ეჭვებს აჩენს. ბოლოს და ბოლოს გარეჯზეა ლაპარაკი, პლუს – საზღვარზე, პლუს – სტრატეგიულ სიმაღლეზე. ყველაფერი ერთადაა. თან ეს არის თემა, რომელიც საქართველოს მოსახლეობას განსაკუთრებით აწუხებს. მე ხომ კომისიასთან ურთიერთობა მქონდა? ვიცი, როგორც იყო. სულ საყვედურობდნენ ერთმანეთს, სადაა ის დოკუმენტებიო? რატომ აკეთებთ ამას, რატომ მივდივართ არასწორი გზითო? ამ რუკაზე ცალსახად იყო ლაპარაკი.
ახლა ამ დოკუმენტების დემონსტრირება არ ნიშნავს იმას, რომ ყველაფერი გადაწყვეტილია, ეს ნიშნავს იმას, რომ ახალი პროცესი დაიწყო და მორჩა.
ძალიან კარგად ვიცით, რომ არცერთ რუკაზე, რომელიც არსებობს, საბჭოთა პერიოდის განმავლობაშია გაკეთებული, არ არის იდენტური მდგომარეობა საზღვართან დაკავშირებით. არის საკამათო უბნები ჩვენს მხარესაც, აზერბაიჯანის მხარესაც. აქედან გამომდინარე, საჭიროა უფრო კვალიფიცირებული მიდგომა ამ საქმის მიმართ. ამ კვალიფიცირებული მიდგომისთვის არ აღმოჩნდა კომისია მზად. კომისიამ თავის მუშობით, განსაკუთრებით – საექსპერტო ჯგუფმა, დაუშვა შეცდომები, რამაც განაპირობა ის დამოკიდებულება, რომელიც ახლაა საზოგადოებაში , სამართალდამცველ ორგანოებში“, – განაცხადა მამუკა არეშიძემ.