“როცა “ნაცმოძრაობიდან“ წამოვედი, მოტრიალდა ყველა ის ადამიანი, ვისთანაც ორი წელი მქონდა გატარებული და მლანძღავდნენ”

ქართულ პოლიტიკაში, ზოგადად, ასეთი კულტურაა: როდესაც რომელიმე პოლიტიკოსი ან პოლიტიკური ლიდერი აფიქსირებს განსხვავებულ პოზიციას, მიღებულია, რომ მგლების ხროვასავით დაესხნენ თავს და დაძიძგნონ, – განაცხადა პარტია „გირჩი – მეტი თავისუფლება“ ლიდერმა, ზურაბ ჯაფარიძემ „რუსთავი 2-თან“, ალეკო ელისაშვილისა და ოპოზიციის სხვადასხვა წარმომადგენელს შორის არსებულ დაპირისპირებაზე საუბრისას.

„როცა „ნაციონალური მოძრაობიდან“ წამოვედი, მოტრიალდა ყველა ის ადამიანი, ვისთანაც ორი წელი მქონდა გატარებული და თვეების განმავლობაში მლანძღავდნენ. ამის შინაარსი ასეთია – ჯოგიდან რომ ერთი რაღაც განსხვავებულს გააკეთებს და მთელმა ჯოგმა უნდა დაკორტნოს იმისთვის, რომ ჯოგის შიგნით, სხვას არავის მოუნდეს იგივეს გაკეთება. სინამდვილეში, ეს რაღაც ცხოველური ინსტინქტია, რაც ძალიან არ მომწონს, საზიზღარი სანახავია. ეს არაა ჯანსაღი, გინდა, მე მეხებოდეს, გინდა – ალეკო ელისაშვილს“ – განაცხადა ზურაბ ჯაფარიძემ.