„ტურისტული ინდუსტრია და ასევე სარესტორნო ინდუსტრია საკმაოდ კანონმორჩილი დარგია, რადგან მათ მშვიდობიანობაზე, კანონმორჩილებაზეა დამოკიდებული ის, ჩამოვა თუ არა ხვალ ჩვენთან უცხოელი ვიზიტორი“, – ამის შესახებ ეკონომიკის მინისტრმა, ნათია თურნავამ გადაცემაში „დღის ქრონიკა“ განაცხადა, როდესაც სარესტორნო ბიზნესის მხრიდან დაუმორჩილებლობის დაანონსებას და შემდეგ გაადწყვეტილების შეცვლას შეეხო.
მინისტრის თქმით, აქედან გამომდინარე იზიარებენ ისინი მშვიდობიან მიდგომას და ყველაზე კარგად იციან ქვეყანაში სიმშვიდის ფასი.
„ამიტომ, დარწმუნებული ვარ, რომ არეულობის, ამბოხის, დაუმორჩილებლობისკენ მოწოდებები სხვა რეპერტუარიდან არის – ასეც არის, რომ ჩვენ ხელში შეგვრჩა პოლიტიკური მოწოდებები და რადიკალური ოპოზიციის მხრიდან, ზოგი ქვეყნის შიგნით და ზოგი ქვეყნის გარედან მოუწოდებს მოსახლოებას და ბიზნესს დაუმორჩილებლობისკენ. ეს არის გზა არეულობისკენ, რომელსაც ჩვენი საზოგადოება არ იზიარებს, განსაკუთრებით ბიზნესი, რომელსაც მშვიდი განვითარება სჭირდება“, – აღნიშნა ნათია თურნავამ.
რაც შეეხება შეკითხვას იმის შესახებ, რომ დაუმორჩილებლობის აქცია შესაძლოა დროში გადაიდოს და არ გაუქმდეს, ნათია თურნავას თქმით, ბიზნესს გლობალურად გაუჭირდა, რადგან ეკონომიკა შემცირდა და საქართველოც ამის ნაწილია.
„რა თქმა უნდა, ბევრ რესტორატორს რეალური პრობლემები ალაპარაკებს, მაგრამ კანონდარღვევას არაფერი ამართლებს“, – აღნიშნა ნათია თურნავამ.
მინისტრი იმედოვნებს, რომ დადებითი კომუნიკაცია შენარჩუნდება რესტორნებთან და ულტიმატუმის ენა არ იქნება გამოყენებული.