გიორგი გახარიას შემცვლელზე გავრცელებული ინფორმაცია არის მოგონილი ამბავი და ატყუებთ საზოგადოებას. ამას, როგორც „ქართული ოცნების“ პოლიტსაბჭოს წევრი და ყველაზე ინფორმირებული ადამიანი გეუბნებით, – ეს განცხადება „ქართული ოცნების“ პოლიტსაბჭოს მდივანმა სხდომის დასრულების შემდეგ მედიასთან გააკეთა.
„ჩვენ ვნახეთ ბინძური სპეკულაცია ამ საკითხთან დაკავშირებით, „ქართული ოცნების“ გუნდი ერთიანია, ძლიერი და არანაირი დაპირისპირება არ არის. გუნდს კარგად ესმის იმ გამოწვევის შესახებ რაც ბიძინა ივანიშვილის პარტიიდან და პოლიტიკიდან წასვლის შემდეგ არსებობს, ისედაც არ გვქონდა ურთიერთობების პრობლემა და ამ გამოწვევას კარგად ვითავისებთ და ვიაზრებთ“,- აღნიშნა მდინარაძემ.
ამასთან, მდინარაძის განცხადებით, წინა დღეების განმავლობაში ადგილი ჰქონდა უდიდეს სპეკულაციებსა და უბრალოდ სტუდიაში ჭორაობას გიორგი გახარიასთან დაკავშირებით.
„ის რომ გახარია არ ესწრებოდა რომელიღაც სხდომას, იყო ერთადერთ არგუმენტად შიდა დაპირისპირების“, – აღნიშნა მდინარაძემ.
„სრული პასუხისმგებლობით შეგვიძლია გითხრათ, სამწუხაროდ ამ ტელევიზიებისა და კონკრეტული რადიკალური პარტიებისა არანაირი დაპირისპირება ჩვენთან არ არის. დღესაც არ იყო გიორგი გახარია პოლიტსაბჭოს სხდომაზე და ამის ერთადერთი მიზეზია ის, რომ მას ჰქონდა სხვა შეხვედრა. ყოველდღიურ რეჟიმში ჩვენ მასთან კომუნიკაცია გვაქვს“, – განაცხადა მდინარაძემ.