როდესაც ადამიანი რომელიმე თანამდებობაზე კონკრეტული ვადით არის არჩეული და მისი თანამდებობა არჩევითია, სულ რომ რამე წინათგრძნობა გქონდეს და გჯეროდეს შენი წინათგრძნობის, არ შეიძლება კონკრეტულ გვარზე ილაპარაკო, რომელიც არჩეული თანამდებობის პირია, – ასე ეხმაურება ფრაქცია „ქართული ოცნების“ თავმჯდომარე მამუკა მდინარაძე პარტია „მოქალაქეების“ წარმომადგენლების განცხადებას, რომ საარჩევნო საკითხზე გაფორმებული მემორანდუმი თამარ ჟვანიას ცესკო-ს თავმჯდომარის პოსტიდან წასვლას ითვალისწინებს.
მისი თქმით, ელისაშვილი და იოსელიანი ძალიან მძიმე შეცდომას უშვებენ, რადგან ისინი ერთი მხრივ დემოკრატიასა და სამართლებრივ პრინციპებზე საუბრობენ, მეორე მხრივ, კონკრეტულ გვარს ასახელებენ, როდესაც ვინმეს გარეშე, ან ვინმესთან ერთად არჩევნების ჩატარებაზე საუბრობენ.
„როდესაც ადამიანი რომელიმე თანამდებობაზე კონკრეტული ვადით არის არჩეული და მისი თანამდებობა არჩევითია, სულ რომ რამე წინათგრძნობა გქონდეს და გჯეროდეს შენი წინათგრძნობის, არ შეიძლება კონკრეტულ გვარზე ილაპარაკო, რომელიც არჩეული თანამდებობის პირია. შეგვიძლია ამაზე ვილაპარაკოთ, ვთანხმდებით, მემორანდუმსაც ხელი მოვაწერეთ და ნორმებშიც აისახება პრინციპი იმის შესახებ რომ, სამივე დონეზე, ცენტრალურ, საუბნო და საოლქო დონეზეც დაკომპლექტების წესი შეიცვლება და ეს იქნება იმის იდენტური, როგორც ეუთო/ოდირმა თავის რეკომენდაციებში, თავის დროზე, მიგვითითა. იქ იყო საუბარი პროფესიონალებით დაკომპლექტებაზე, ამაზეც ვიმსჯელეთ“, – განაცხადა მამუკა მდინარაძემ.