ჩვენ უნდა ვიცოდეთ, მივეკუთვნებით თუ არა მაღალი რისკის ჯგუფს, უნდა ვიცოდეთ ის ჩივილები, რაც თრომბოზს ახასიათებს და არა ის, რომ ლაბორატორიული ტესტები ვიკეთოთ, – ამის შესახებ ჰემატოლოგმა, ლევან მახალდიანმა „პირველი არხის“ გადაცემაში „პირადი ექიმი მარი მალაზონია“ სტუმრობისას განაცხადა.
მან ისაუბრა იმ დაავადებებსა და მდგომარეობაზე, რაც ადამიანში თრომბოზის გამომწვევ მიზეზს წარმოადგენს. შესაბამისად, ჰემატოლოგი მოქალაქეებს თრომბოზთან დაკავშირებით სიფრთხილის გამოჩენას ურჩევს.
„დიდი ხანია ცნობილი, ვინ არის თრომბოზის მაღალი რისკის ქვეშ. ბევრ კლინიკას აქვს სპეციალური კითხვარი. ყველა პაციენტი, რომელიც სტაციონარში ხვდება, აუცილებლად უნდა შეფასდეს. ეს კოვიდპანდემიამდეც ასე იყო. კითხვარის შევსების შედეგად შეგვეძლო, პაციენტი მიგვეკუთვნებინა თრომბოზის მაღალ რისკს. ასეთ შემთხვევაში პაციენტს სისხლის გამათხელებლებს უკეთებენ, მიუხედავად იმისა ანალიზებში, კოაგულოგრამაში, პროთრომბინის ინდექსი ან დედიმერი ექნება მაღალი თუ არა. ეს მაჩვენებლები საერთოდ არ არის საჭირო, რომ პაციენტი ასეთ რისკს მიაკუთვნო.
ასევე, ონკოლოგიური პაციენტები, შაქრიანი დიაბეტი და ჭარბი წონა – ეს არის სამი ძირითადი ფაქტორი, რაც ადამიანს მაღალი რისკის ჯგუფში აყენებს. თუმცა, არის სხვა რისკ-ფაქტორებიც. კერძოდ, იმობილიზაცია, ათეროსკლეროზი, ტრავმა, მოტეხილობა და ოპერაციული ჩარევა. ეს ყველა ის მდგომარეობაა, რომლის შემდეგაც ფრთხილად უნდა ვიყოთ“, – განაცხადა ლევან მახალდიანმა.