ვისაც თავის ცოდვებზე მშვიდად, წყნარად საუბარი და შენდობის თხოვნა უნდა, პრობლემა არ ექნება, გამოვუყოფ დროსაც და სიტუაციასაც. კამათს რაც შეეხება, მეკამათონ წერილობით და წერილითვე გავცემ პასუხს, რადგან ამ ადამიანებთან საუბარი შეუძლებელი გახდა, – ასე გამოეხმაურა ჭყონდიდის ეპისკოპოსი, მეუფე სტეფანე ეპარქიაში მიმდინარე მოვლენებსა და დაპირისპირებული სასულიერო პირების განცხადებებს.
მისივე განცხადებით, ყველა მცდელობა, დისკუსიის ფორმატში განეხილა მათთან საკითხები, უშედეგო აღმოჩნდა.
„რაც შემეძლო, ყველაფერი გავაკეთე, ყველანაირად ვეცადე, რომ ჩემი საუბრით პასუხი გამეცა, მაგრამ არც ერთხელ არ მომეცა საშუალება, რომ სიტყვა დამემთავრებინა. ეს ყველაფერი ყველამ საკუთარი თვალით ნახა. სამწუხაროა, რომ დღეს ამ თემებზე გვიწევს საუბარი, თუმცა ეს ცხოვრება მოვიდა“ – განაცხადა მეუფე სტეფანემ.
ეპარქიის ხელმძღვანელმა სალხინოს მონასტერი უკვე დატოვა. მრევლმა ის შეძახილით – „გვიყვარხარ“ გააცილა.
სალხინოს მამათა მონასტერში სიტუაცია დილიდან დაიძაბა. ერთმანეთს სასულიერო პირები და ეპარქიის წარმომადგენლები ფიზიკურად დაუპირისპირდნენ. შსს-მ მომხდარზე გამოძიება უკვე დაიწყო.