ვაქცინაცია უნდა იქცეს საერთო სახალხო მოძრაობად, – ამის შესახებ დაავადებათა კონტროლის ეროვნული ცენტრის ხელმძღვანელმა, ამირან გამყრელიძემ მცხეთაში განაცხადა, სადაც სამედიცინო ცენტრი მოინახულა.
მისი თქმით, ვაქცინაციის გარეშე ეპიდემია არ დასრულდება.
„აცრის გარეშე ეპიდემია არ დასრულდება. ამიტომ წელს ქვეყანაში ეს უნდა იქცეს საერთო სახალხო მოძრაობად. ამაზე დიდი პრიორიტეტი არ უნდა იყოს. ვაქცინაცია დაასრულებს იმას, რომ აღარ დაგვეღუპებიან ადამიანები, პირდაპირ მშურს ისრაელის, რომელმაც ამ სამი დღის წინ გამოაცხადა, რომ 10 თვის განმავლობაში პირველი დღე ჰქონდათ, როცა ისრაელში კოვიდით ადამიანი არ გარდაცვლილა. მეც ძალიან მინდა, რომ საქართველოში დადგეს დღე, როდესაც კოვიდით ადამიანი აღარ დაგვეღუპება“, – განაცხადა ამირან გამყრელიძემ.
მისი თქმით, მცხეთა-მთიანეთის მუნიციპალიტეტებში 4-დან ამცრელი პუნქტების რაოდენობა 136-მდე ავა. მცხეთა „ასტრაზენეკაზე“ და „სინოფარმზე“ იმუშავებს, დანარჩენი მუნიციპალიტეტები- „სინოფარმზე“.