ინფექციური საავადმყოფოს დირექტორი, თენგიზ ცერცვაძე, აღდგომის ღამეს მოქალაქეებს სოციალური დისტანციის დაცვისა და პირბადის ტარებისკენ მოუწოდებს. ცერცვაძე დაწესებულ შეზღუდვებს მინიმალურს უწოდებს, რომელთა დაცვაც, მოქალაქეების ჯანმრთელობის დასაცავად, აუცილებელია. რაც შეეხება მოსახლეობის წუხილს სასაფლაოზე გასვლის აკრძალვასთან დაკავშირებით; კლინიკის დირექტორი მას აუცილებელს უწოდებს.
„კომენდანტის საათი რჩება, აღდგომის ღამეს იქნება გამონაკლისი. ერთადერთი ყველაზე შესამჩნევი შეზღუდვა, რომელიც აწუხებს მოსახლეობას და ისმის კრიტიკული შენიშვნები, არის სასაფლაოზე გასვლის შეზღუდვა 2-3 და 4 მაისს, მხოლოდ სამი დღით. ამ შეზღუდვის გარდა, არანაირი სერიოზული შეზღუდვა არ არის. პირიქით – აღდგომის შემდეგ, ერთი კვირა შვებულებაა გამოცხადებული და ადამიანებს შეუძლიათ, დაისვენონ. სააღდგომო რეკომენდაცია განსაკუთრებული არაფერი არაა, გარდა იმისა, რომ სასაფლაოზე გასვლა შეზღუდულია და სადაც შეიკრიბებიან ადამიანები, დისტანცია უნდა დაიცვან. მეტი არაფერი განსაკუთრებული რეკომენდაცია არაა“, – აღნიშნავს თენგიზ ცერცვაძე.