რა გახდა ბათუმში 5 თვის გოგონას გარდაცვალების მიზეზი?

ბათუმში 5 თვის გოგონა დაიღუპა, ხოლო მისი 6 წლისა და წლინახევრის ძმები ამ დრომდე ბავშვთა საავადმყოფოში არიან მოთავსებული.

სამივე და-ძმა სასუნთქი გზების პრობლემებით საავადმყოფოში მას შემდეგ მოხვდნენ, რაც სოციალური აგენტი ოჯახში დეკლარაციის შესავსებად მივიდა. ბავშვების ოჯახი ჯერ კახეთში ცხოვრობდა, შემდეგ გურიაში, შემდეგ კი ბათუმის მიმდებარედ ჩაქვში ნაქირავებ ბინაში დასახლდა. ოჯახი სოციალურად დაუცველთა ბაზაში წლების განმავლობაში იყო და სახელმწიფოსგან დახმარებას იღებდა.

5 თვის გოგონას გარდაცვალებასთან დაკავშირებით რამდენიმე ვერსია ვრცელდება. პირველი – მცირეწლოვანს საკვები ვერ მიეწოდებოდა, მეორე – ბავშვზე არასათანადოდ ზრუნავდნენ, მესამე – გარდაცვალება ბავშვის თანდაყოლილ პათოლოგიებს უკავშირდება.

როგორც აჭარის სოციალური მომსახურების სააგენტოს აჭარის ფილიალის უფროსმა, თემურ ქარცივაძემ Ambebi.ge-ს განუცხადა, მათ ოჯახის შესახებ ინფორმაცია არ ჰქონდათ გამომდინარე იქიდან, რომ ისინი გურიაში ცხოვრობდნენ.

მისივე ინფორმაციით, ბავშვის გარდაცვალება თანდაყოლილ პათოლოგიებს უკავშირდება. რაც შეეხება გარდაცვლილის მცირეწლოვან ძმებს, რომლებიც საავადმყოფოში არიან მოთავსებულნი, მათზე მზრუნველობა შესაძლოა, სახელმწიფომ აიღოს.

“ბავშვს დაბადებისთანავე ჰქონდა თანდაყოლილი პათოლოგიები. ის 5 თვიდან 3 თვე და 20 დღე თბილისის, ქუთაისის და ბათუმის სხვადასხვა კლინიკაში მკურნალობდა. ბათუმის დედათა და ბავშვთა ცენტრში სამ დღიანი მკურნალობის შემდეგ ბავშვი სამწუხაროდ, გარდაიცვალა. ამის მიზეზი შიმშილი არ გამხდარა, რადგან როგორც იცით, ბავშვმა სიცოცხლის უმეტესი დრო საავადმყოფოებში ექიმების მეთვალყურეობის ქვეშ გაატარა. რაც შეეხება ოჯახს, ეს ოჯახი საკმაოდ ხშირად იცვლიდა საცხოვრებელ ადგილს. ბოლოს გურიაში, სუფსაში ცხოვრობდა და სახელმწიფოს მხრიდან როგორც სოციალურ დახმარებას ასევე, სხვა ბენეფიტებს ღებულობდნენ. ოჯახს მხოლოდ სახელმწიფოს მხრიდან გაღებული თანხა აძლევდა საშუალებას, რომ ბავშვებისთვის ნორმალური ზედამხედველობა გაეწია. მოკვლევისა და მშობლებთან შეათანხმებით, თუ საჭირო გახდება, აღზრდის ალტერნატიული ფორმები შეიძლება მოიძებნოს. როდესაც ოჯახში არ არის პირობები, რომელიც ბავშვის აღზრდას სჭირდება, სახელმწიფოს მხრიდან არის მინდობით აღზრდის შესაძლებლობა”, – აღნიშნა თემურ ქარცივაძემ.

ექიმის ვახტანგ აფხაზავას თქმით, 5 თვის გოგონა საავადმყოფოში სუნთქვის უკმარისობით შევიდა და მკურნალობის მიუხედავად პაციენტის გადარჩენა ვერ მოხერხდა.