მინდა, მივულოცო ოზურგეთის საზოგადოებას, დღეს არის დიდი ზეიმი, რადგან ოზურგეთს ამშვენებს ეს უნიკალური თეატრი, – ამის შესახებ საქართველოს პრემიერ-მინისტრმა ირაკლი ღარიბაშვილმა განახლებულ ოზურგეთის თეატრში სიტყვით გამოსვლისას განაცხადა.
„ოზურგეთის თეატრი 150 წელს ითვლის, ეს სილამაზე, ეს დიდებული თეატრი გარემონტდა ბიძინა ივანიშვილის უშუალო დაფინანსებითა და ფონდი „ქართუს“ დახმარებით“, – განაცხადა ღარიბაშვილმა.
პრემიერ-მინისტრის განცხადებით, დღეს ასევე ოზურგეთში ანზორ ერქომაიშვილის სახელობის სახელმწიფო ფოლკლორის სტელა გაიხსნა. „ჩვენ კიდევ ერთხელ მოვიგონეთ ეს დიდებული ადამიანი“, – აღნიშნა ღარიბაშვილმა.
მისი თქმით, გურია გამორჩეულია ნიჭიერი ადამიანებით. „ანზორ ერქომაიშვილის მაგალითი ადასტურებს, თუ რაოდენ გამორჩეული მხარეა გურია და გურული ხალხი. მინდა, ყველას დიდი სითბოთი, სიყვარულით და პატივისცემით მოგეფეროთ. გილოცავთ კიდევ ერთხელ ოზურგეთის თეატრის რეაბილიტაციის შემდეგ გახსნას“, – აღნიშნა ღარიბაშვილმა.
პრემიერ-მინისტრი გურიაში იმყოფება. ირაკლი ღარიბაშვილი მთავრობის წევრებთან ერთად, ოზურგეთის თეატრის გახსნას დაესწრო.