“ნაციონალურ მოძრაობაში” თუ ვინმე დაიღალა ბრძოლით, სახლში წავიდეს”

ნანუკა ჟორჟოლიანი ნაციონალური მოძრაობის პარლამენტში შესვლის წინააღმდეგია. ამის შესახებ მან სოციალურ ქსელში დაწერა:
,,კიდევ ერთი და ჩემი ბოლო პოსტია პოლიტიკაზე. მერე მეც პეპლებზე დავიწყებ წერას და ჩემი ეს განწყობა არა ბიძინა ივანიშვილის, არამედ მთელ ოპოზიციის ბრალია. ზოგადად, ეს ნიჰილიზმი რაც ხალხშია, ამჯერად ოპოზიციის მხრებზე კიდია და ესაა მთავარი იარაღი, რითიც ბიძინა იგებს.
ხალხს უკვე ყელში აქვს ეს პოლიტიკური მარაზმი. ნაციონალურ მოძრაობას ხალხმა ხმა მისცა იმიტომ, რომ ეს მთავრობა შეეცვალათ. თქვენი თბილ სავარძლებში ჯდომა მაგრად კიდია ხალხს. პარლამენტში ჯდომით ვერასოდეს, ვერაფერი შეცვალეთ მშიერი ადამიანებისთვის.
ხალხი ფიქრობს, რომ ნიკა მელიაა ლიდერი იმიტომ, რომ თავი შეწირა და ელისაშვილს არ დაემსგავსა. რეგიონებში ვიყავით გამოკითხვაზე და წადით, ჰკითხეთ, რას ფიქრობენ ისინი. ადამიანებს ჰკითხეთ, როგორ უნდა მოიქცეთ, შეეშვით პოლიტსაბჭოს, პარტიაში განხილვას, მიშასაც ნუ ჰკითხავთ, ხალხს ჰკითხეთ სოფლებში.
წარმომედგინა, რომ ნიკა, ხატია, ელენე, თინა, ახალგაზრდები გაიშლებოდნენ რეგიონებში, მიიბავდნენ ახალგაზრდებს, ზუსტად ისეთ მოდელებს შექმნიდნენ ქვეყნის მასშტაბით, როგორიც თბილისში შექმნეს საკუთარ საარჩევნო შტაბებში და დაიწყებოდა ახალი მოძრაობა.
შეხედეთ, როგორ გამოიყურებიან პოლიტიკოსები, რომლებიც პარლამენტში არიან და იმედია, არ გინდათ, მათ ჰგავდეთ. მესმის, რომ დიპლომატიური კორპუსის ტყვეობაში ხართ, მაგრამ აქეთ თქვენი ამომრჩეველია, რომელსაც დაკარგავთ.
ნაციონალურ მოძრაობაში ვინც დაიღალა ბრძოლით, იქნებ სახლში წავიდეს და გზა დაუთმოს სხვებს.
პ.ს. კიდევ კარგი, რომ წყალტუბოდან-თბილისში ჩამოვედი და ელენეს მივეცი ხმა. ძალიან ღირსეულად გამოიყურება დღეს”.