მიმდინარე წლის განმავლობაში ნაძალადევის რაიონში შიდაკვარტალური გზები 10 მისამართზე რეაბილიტირდა. წლის ბოლომდე კორპუსებთან მისასვლელი გზები კიდევ 9 მისამართზე შეკეთდება.
ერთ-ერთი პროექტი ზღვისუბნის XI მ.რ. I კვ. N9 კორპუსის მიმდებარედ განხორციელდა, სადაც ასფალტის საფარი 1 800-მდე კვ.მ ფართობზე დაიგო, ასევე, მოეწყო ბორდიური.
ბოლო ეტაპის სარეაბილიტაციო სამუშაოებს ნაძალადევის რაიონის გამგებელი ირაკლი ხელაძე გაეცნო.
„ნაძალადევის რაიონში აქტიურად მიმდინარეობს შიდაკვარტალური გზების მოწესრიგება. ამჟამად ვიმყოფებით ზღვისუბანში, სადაც რამდენიმე კორპუსის მიმდებარედ მოწესრიგდა საგზაო ინფრასტრუქტურა. დაზიანებული გზა მოსახლეობისთვის საკმაოდ დიდ პრობლემას წარმოადგენდა გადაადგილების კუთხით. ამ მისამართზე საგზაო სამუშაოები დღეს დასრულდება და ამ მხრივ, ადგილობრივებს პრობლემები აღარ შეექმნებათ“, – განაცხადა ირაკლი ხელაძემ.
აღნიშნულ მისამართზე მიმდინარე ინფრასტრუქტურული პროექტისთვის ნაძალადევის რაიონის გამგეობა ბიუჯეტიდან 105 000-მდე ლარს გამოყოფს.