ქალაქის ისტორიულ ნაწილს რაც შეეხება, აღდგა ისტორიული ლანდშაფტის დაცვის ზონა, – ამის შესახებ საკრებულოს თავმჯდომარემ გიორგი ტყემალაძემ „იმედის ფაქტორში“ განაცხადა.
მან განმარტა, თუ რას ნიშნავს ქალაქის ისტორიული ნაწილის დამცავი ზონების აღდგენა.
„ისტორიულ ნაწილს რაც შეეხება, აღდგა ისტორიული ლანდშაფტის დაცვის ზონა. ეს ნიშნავს იმას, რომ ქალაქს წლების განმავლობაში არ ჰქონდა, ისტორიული ლანდშაფტის დაცვის ზონა. გამქრალი იყო. ასეთი რუკა არ არსებობდა. რა თქმა უნდა, ახალი გენგეგმის მიღების ეტაპზე უკვე გენგეგმაშია ასახული და შეგვიძლია ვთქვათ, რომ ასეთი რუკა გვაქვს. იგი გულისხმობს, რომ ქალაქის ისტორიული ნაწილის ზონაში ყველანაირი სახის მშენებლობა აკრძალულია. რა თქმა უნდა, ჩვენ გვაქვს კიდევ ისტორიული სხვა არეალები, რომლებიც ასეთი მკაცრი არ არის“, – განაცხადა გიორგი ტყემალაძემ.
მისივე თქმით, მშენებლობებზე შეთანხმება ისტორიულ საბჭოსთან ხდება, რომელიც არა მხოლოდ მერიისა და საკრებულოს წარმომადგენლებისგან არის დაკომპლექტებული, არამედ შესაბამისი ექსპერტებისგან.