რელიგიის საკითხთა სახელმწიფო სააგენტოს თავმჯდომარე ზაზა ვაშაყმაძე, რელიგიური ორგანიზაციების წარმომადგენლები და რელიგიის საკითხთა სახელმწიფო სააგენტოს თანამშრომლები კორონავირუსის საწინააღმდეგო ვაქცინით აიცრნენ.
მათ ვაქცინაცია ნიკოლოზ ყიფშიძის სახელობის ცენტრალურ საუნივერსიტეტო კლინიკაში ჩაუტარდათ. როგორც ზაზა ვაშაყმაძემ აღნიშნა, დღეს დაახლოებით 40 ადამიანი აიცრა.
„რელიგიის საკითხთა სახელმწიფო სააგენტოს ინიციატივით, ვაქცინაციასთან დაკავშირებით დიალოგი გაიმართა საქართველოში არსებულ ყველა რელიგიის წარმომადგენლებთან. მინდა, მადლობა გადავუხადო საქართველოში არსებული თითქმის ყველა რელიგიის წარმომადგენელს, იმ აქტიურობისა და სამოქალაქო პასუხისმგებლობისთვის, რაც მათ გამოიჩინეს საჯაროდ. ეს სტიმული იქნება საზოგადოებაში, მრევლში, რათა გაიზარდოს ნდობა აცრისადმი, შესაბამისად, გაიზარდოს აცრის ტემპი და მოხდეს ამ ეპიდემიის დამარცხება“, – განაცხადა ზაზა ვაშაყმაძემ.