მჯერა, რომ ყველას თანაბრად შეგვტკივა გული გელათზე და თუ ეს ასეა, მოდი, შევწყვიტოთ ხარაჩოებზე სიარული, – ამის შესახებ საქართველოს კულტურის, სპორტისა და ახალგაზრდობის მინისტრმა თეა წულუკიანმა „ქრონიკას“ განუცხადა.
მისი თქმით, გელათში ამჟამად წყალი არ ჩადის და ძეგლთა დაცვის ეროვნული სააგენტო ყველაფერს აკეთებს, რომ დაზიანებული და შრობის პროცესში მყოფი ფრესკის ნაწილაკები არ ჩამოცვივდეს.
„გელათის გადახურვის 2008 წელს შემუშავებული პროექტის შესაბამისად, რომელმაც არაერთხელ განიცადა არასწორი კორექტირებები ჯერ კიდევ წინა ხელისუფლების დროს, შემდეგ ჩვენი ხელისუფლების დროს ძეგლთა დაცვის სისტემაში, რომელიც წინა ხელისუფლების დროს მოიშალა, ინერციით გაგრძელდა საზიანო პროცესები ისე, რომ ჩვენ მივიღეთ ის, რასაც მე დავარქვი – „გელათზე ძველი კრამიტით გადახურვის ქართული ტრადიციის აღდგენის ექსპერიმენტი“. რა თქმა უნდა, ამგვარი ტრადიციის აღდგენა არ არის ცუდი საქმე, ოღონდ როდესაც ტრადიცია აღდგება, რომელსაც აქვს მრავალსაუკუნოვანი წყვეტა, ვფიქრობ, ის გელათზე კი არ უნდა გამოიცადოს, არამედ მცირე მნიშვნელობის კულტურული მემკვიდრეობის ძეგლზე, თუკი ასეთი მნიშვნელობის ძეგლი საერთოდ გვაქვს ქართველებს.
ვფიქრობ, რომ არცერთი კულტურული მემკვიდრეობის ძეგლი არ იმსახურებს იმას, რომ ვინმემ მასზე ექსპერიმენტები ატაროს, მაგრამ, შერჩეულ იქნა სწორედ 2008 წელს გელათი საექსპერიმენტოდ და ეს ექსპერიმენტი, თამამად შეგვიძლია ვთქვათ, რომ 2020 წელს დასრულდა და ჩემი მინისტრობის პერიოდში არ გაგრძელდება.
წყალი ამჟამად არ ჩადის, არა ყველა ფრესკა და ფრესკის ყველა ნაწილი, მაგრამ არაერთი ნაწილი არის დაზიანებული და ძეგლთა დაცვის ეროვნული სააგენტო ყველაფერს აკეთებს, რომ დაზიანებული და შრობის პროცესში მყოფი ფრესკის ნაწილაკები არ ჩამოცვივდეს.
მე მჯერა, რომ ყველას თანაბრად შეგვტკივა გული გელათზე და თუ ეს ასეა, მოდი შევწყვიტოთ ხარაჩოებზე სიარული. ჩემი ბრიფინგის შემდეგ შემატყობინეს, რომ ტელეკომპანია „ფორმულის“ გადამღები ჯგუფი ლამობდა ხარაჩოებზე ასვლას და მადლობა უნდა გადავუხადო საქართველოს ეკლესიას, რომ არ დაუშვეს ეს ფაქტი, ვინაიდან ისინიც ხედავენ ყოველდღე რა ზიანი შეიძლება მოჰქონდეს არაუფლებამოსილი პირის ხარაჩოზე სეირნობას სკანდალის შექმნის მიზნით, ამიტომაც დაიხურება ხარაჩოზე ასასვლელი“, – განაცხადა თეა წულუკიანმა.