თბილისის მერიამ, საქართველოს ეროვნული გმირის, მერაბ კოსტავას სახლი სრულად აღადგინა, სადაც ამჟამად მის ქალიშვილს სამხატვრო სახელოსნო აქვს მოწყობილი. ამის შესახებ ჟურნალისტი ნინო მიქიაშვილი წერს სოციალურ ქსელში და მადლობას უხდის დედაქალაქის მერ კახა კალაძეს, ასევე თბილისის მერიას.
“გაიხარეთ თქვენს ცოლ-შვილში, იმ სიკეთისთვის, რაც მერაბ კოსტავას შვილისთვის – თამთასთვის გააკეთეთ.
მე ჩემს მეგობრებთან და ახლობლებთან ერთად მადლობას ვუხდი თბილისის მერიდან დაწყებული რიგითი ოსტატით დამთავრებული, ვინც თამთას სახლის მოსაწესრიგებლად გადაწყვეტილება მიიღო, ვინც ჭერი შეაკეთა, იატაკს და კედლებს მიხედა.
უფალი სულ სიკეთით გადაგიხდით. იმ ოთახში, რომელიც თამთას სახელოსნოდ აქვს მოწყობილი, გარკვეული პერიოდის წინ ჭერი დაზიანდა ისე, რომ თავად მითხრა – მაგ დროს ოთახში რომ ვყოფილიყავი, ალბათ, ვერ გადავრჩებოდიო.
თამთას სახლის პრობლემაზე თბილისის მერს ბატონ კახი კალაძეს განცხადებით მიმართა ეროვნული მოძრაობის ერთ-ერთი ლიდერის ირაკლი წერეთლის მეუღლემ ლალი ბარძიმაშვილმა. განცხადებას მერმა ვიზა დაადო და მერიამ მოაწესრიგა არამხოლოდ დაზიანებული ჭერი, არამედ მთლიანად სახლი, რის გამოც თამთა ძალიან მადლიერია.”– წერს ნინო მიქიაშვილი.