ლექსებს წერდა და ოცნებობდა, მეგობრობდა და ადამიანებს აღმერთებდა, მერე ამ პოეტ ქალს სხვებმა დაუწერეს, დაუწერეს უკურნებელი დიაგნოზის დასკვნა… “სიმსივნე” – განაჩენივით ჟღერდა და განაჩენივითვე მიიღო – აზრი აქვს მკურნალობას, მაინც არაფერი მეშველებაო, უთქვამს. თუმცა, არ დანებდა და ბოლომდე იბრძოლა, მაგრამ ვერაგმა დაავადებამ მაინც დაამარცხა და აღდგომის დღესასწაულზე საფრანგეთის ერთ-ერთ კლინიკაში დაიღუპა. ოჯახი ვარაუდობს, რომ მდგომარეობის დამძიმება კორონავირუსმა კიდევ უფრო დააჩქარა.
ქართველ ქალს, პოეტ რუსა მერაბიშვილს სიმსივნის დიაგნოზი 44 წლის ასაკში საქართველოში დაუსვეს, ქიმიოთერაპია არ შველოდა, ამიტომ საფრანგეთში წავიდა. ავადმყოფობის დროს, მას მეუღლე უვლიდა, პერიოდულად აკითხავდა, მოხუცმა დედამ კი ბოლომდე არაფერი იცოდა, უფრთხილდებოდა.
ნიჭიერ პოეტზე ჟურნალ “სარკესთან” რუსა მერაბიშვილის და, იამზე და მეგობარი, მეგი მოლოდინი საუბრობენ.
“ბოლოს დამძიმდა რუსას მდგომარეობა, მაგრამ ისეთი საოცარი ბუნების იყო, გარდაცვალებამდე 3 დღით ადრე ხმოვან შეტყობინებაში ბოდიშს მიხდიდა – ყურადღებას ვერ გაქცევო. მხოლოდ ჩემს მიმართ არ იყო ასეთი თბილი, ძალიან ბევრი ჰყვარებია, ბევრს მწერდა და და ყველა წინადადება მთავრდებოდა სიტყვით – “მიყვარხარ”.
ის როგორც პოეტი უნიჭიერესი იყო.
ნიჭიერი პოეტი შეიძლება ბევრი იყოს, მაგრამ ყველა პოეტი არ არის ადამიანი…
გული მწყდება, რომ კრებული არ აქვს, თუმცა სამეგობროში გარკვეული გეგმები აქვთ და ალბათ, წიგნს დაუბეჭდავენ.” – ამბობს მეგი მოლოდინი.
პოეტის და, იამზე მერაბიშვილი გარდაცვლილ დაზე საუბრობს.
საქართველოში ჩამოსვლას ფიქრობდა ბოლოს, მაგრამ კოვიდი შეხვდა. იმდენად უფრთხილდებოდა დედას, რომ აქამდე მან არაფერი იცოდა რუსას დაავადების შესახებ, მისი გარდაცვალების შემდეგ გაიგო… ბილეთებიც კი შეძენილი ჰქონდა საქართველოში წამოსასვლელად და როცა კოვიდზე ტესტი აიღო, აღმოჩნდა, რომ ვირუსი ჰქონდა. ვეღარ წამოვიდა, ალბათ კორონავირუსმა კიდევ უფრო დააჩქარა ეს ამბავი.
სხვისი ტკივილი უფრო სტკიოდა, ვიდრე – თავისი. საფრანგეთში მის მეგობარს ძმა გარდაეცვალა და თვითონ წამალი არ მიიღო იმის გამო, რომ მეგობრის გვერდით ყოფილიყო
საფრანგეთში მასთან ძირითადად მეუღლე იყო, პერიოდულად ჩადიოდა კიდეც… ასაკოვან დედას მარტო ვერ ვტოვებდი. რუსას ორი ბიჭი და სამი შვილიშვილი დარჩა…
საავადმყოფოში დაიღუპა, ექიმები ამბობდნენ, ამ დიაგნოზით პაციენტები მე-4 ეტაპამდეც კი ვერ მიდიან, რუსა კი მე-7 ეტაპამდე მივიდაო, მას ბრძოლისთვის მადლობასაც უხდიდნენ, იმდენად ძლიერი იყო.” – ამბობს პოეტის და.