თავისუფლების მოედანზე საქართველოს დამოუკიდებლობის დღის აღსანიშნავ ღონისძიებასთან დაკავშირებით ემზადებიან.
26 მაისს თავისუფლების მოედანზე მოეწყობა სამხედრო ტექნიკის, შეიარაღებისა და აღჭურვილობის გამოფენა.
ამასთან, საქართველოს დამოუკიდებლობის დღეს გაიმართება ფიცის დადების ცერემონიალი. როგორც თავდაცვის ძალების მთავარმა სერჟანტმა გიორგი გოგოჭურმა აღნიშნა, ხვალ ფიცს დადებს 247 რეკრუტი.
„მინდა, წინასწარ მივულოცო საქართველოს 26 მაისი. განსაკუთრებით თავდაცვის ძალების პირად შემადგენლობას, რადგან თავდაცვის ძალები სწორედ ის დანაყოფია, რომელიც უზრუნველყოფს ქვეყნის სუვერენიტეტის დაცვას.
ამასთან, მინდა აღვნიშნო, რომ ხვალ, საზეიმო ვითარებაში ფიცს დადებს 247 რეკრუტი. პანდემიის გამო, წელს ძალიან მოკრძალებულად გაიმართება 26 მაისის ღონისძიება. ღონისძიება დაიხურება „სუ-25“-ის ტიპის გამანადგურებლების გადაფრენით“, – განაცხადა გიორგი გოგოჭურმა.
1991 წლიდან მოყოლებული, 26 მაისს საქართველო დამოუკიდებლობის დღეს აღნიშნავს.