ნაძალადევის რაიონში კორპუსებთან მისასვლელი გზების რეაბილიტაცია მიმდინარეობს. საგზაო ინფრასტრუქტურის მოწესრიგება დასრულდა სანზონის დასახლება N4ვ და N4გ კორპუსების მიმდებარედ.
აღნიშნულ მისამართზე პირველ ეტაპზე წყალარინების შიდა და გარე ქსელი შეიცვალა, რის შემდეგაც 910 კვ.მ ფართობზე ასფალტის საფარი დაიგო. ასევე, N4გ კორპუსში არსებული დაზიანებული ლიფტი რეაბილიტირდა.
ბოლო ეტაპის სამუშაოებს ნაძალადევის რაიონის გამგებელი ირაკლი ხელაძე გაეცნო.
„სარეაბილიტაციო სამუშაოების განხორციელებით 96 ოჯახს აღარ შეაწუხებს ინფრასტრუქტურული პრობლემები. პროექტის ფარგლებში, შევცვალეთ წყალარინების ქსელი, მოვაწყვეთ ბორდიური და დავაგეთ ახალი გზის საფარი, ასევე, რეაბილიტაცია ჩავუტარეთ მოძველებულ ლიფტს. წლის ბოლომდე, ნაძალადევის რაიონის მასშტაბით, მსგავსი პროექტები სხვადასხვა მისამართზე აქტიურად გაგრძელდება“, – განაცხადა ირაკლი ხელაძემ.
სანზონის დასახლება N4ვ და N4გ კორპუსებში შესრულებული სამუშაოების საერთო ღირებულება 88 000 ლარია.