თბილისის ვიცე-მერი ირაკლი ხმალაძე აცხადებს, რომ გადაწყვეტილება მეტროს ახალი სადგურების დამატების შესახებ კომპლექსურად უნდა იყოს მიღებული, ვინაიდან ეს საკმაოდ მნიშვნელოვან ხარჯებთანაა დაკავშირებული. ამ საკითხზე მან „ქრონიკის“ ეთერში ისაუბრა.
„უნდა შევაჯამოთ, შევძლებთ თუ არა ამ ხარჯებით ქალაქისთვის ადეკვატური სიკეთის მოტანას. მაშინ როდესაც ფინანსური რესურსები ყოველთვის შეზღუდულია, გადაწყვეტილებების მიღების დროს სწორედ ასეთი მიდგომაა საჭირო. სამგორის მიმართულებით მიმდინარეობდა ტექნიკურ-ეკონომიკური კვლევა, რომელმაც სახარბიელო შედეგები არ აჩვენა. აქედან გამომდინარე, ამ თემაზე მსჯელობა ჯერ კიდევ მიმდინარეობს. რაც შეეხება დიდი დიღმის მიმართულებას, აქ მხოლოდ კონსულტაციის დონეზე ვართ. როგორც კი გარკვეულ ეტაპზე გადავა ეს საკითხი და გადაწყვეტილება იქნება მიღებული, ცხადია, საზოგადოება ამის შესახებ გაიგებს“, – განაცხადა ირაკლი ხმალაძემ.