ქუჩიდან წამოყვანილი ბავშვისთვის ნებისმიერი პირობა უკეთესობაა, – ამის შესახებ ახალქალაქისა და კუმურდოს მიტროპოლიტმა მეუფე ნიკოლოზმა “ტვ პირველის” ეთერში ნინოწმინდის ბავშვთა პანსიონატთან დაკავშირებით განაცხადა.
მისი თქმით, მეტანია დასჯა არ არის, ის ლოცვის ატრიბუტია და მცირე ასაკიდანვე აჩვევენ ბავშვებს, როგორ იცხოვრონ.
“დავიწყოთ იქიდან, რა პირობებში იყვნენ ბავშვები. რა პირობებში იყვნენ, ის არ გაინტერესებთ?! ქუჩაში რომ ცხოვრობენ ბავშვები, ის ვის აინტერესებს? ნაციონალიზაციით არ მინდა დავყო, მაგრამ უცხო ქალები რო დგანან და ბავშვები რომ უჭირავთ ხელში და ბავშვის უფლებები რომ ირღვევა, ის ვინმეს აინტერესებს?! ბავშვები რომ საშინელ პირობებში ცხოვრობენ ქუჩაში, ამაზე ერთი რეპორტაჟი მაინც გაგიკეთებიათ?! ჩვენ ის ბავშვები წამოვიყვანეთ.
მეტანია დასჯა არ არის. თქვენ რომ არ გაგიკეთებიათ იმიტომ ამბობთ. მეტანია როგორ შეიძლება დასჯის მეთოდი იყოს?! ჩვენ მცირე წლოვანი ასაკიდან ვაჩვევთ ადამიანს, როგორ იცხოვროს. ლოცვა როგორ შეიძლება დასჯა იყოს?! მეტანია ლოცვის ატრიბუტია. წაიღეთ კამერები, ნახეთ როგორ ცხოვრობენ ქუჩაში ბავშვები. იქიდან წამოვიყვანეთ და ქუჩიდან წამოყვანილი ბავშვისთვის ნებისმიერი პირობა უკეთესობაა”, – განაცხადა მეუფე ნიკოლოზმა.
შეგახსენებთ, სახალხო დამცველის წარმომადგენლებს ნინოწმინდის ბავშვთა პანსიონში არ უშვებენ. აღნიშნულ საკითხზე საუბრისას სხალთის ეპისკოპოსმა მეუფე სპირიდონმა რამდენიმე დღის წინ ომბუდსმენი გააკრიტიკა და შეურაცხყოფა მიაყენა: “კაცი ხარ თუ ქალი ხარ ის ვერ გაგიგია და შენ ვინ უნდა შეამოწმო?!”.