ევროკავშირის ელჩი საქართველოში, კარლ ჰარცელი იმერეთს, რაჭას და სამეგრელოს ეწვია და ევროკავშირის მხარდაჭერას ხაზი გაუსვა.
2021 წლის 23-25 ივნისს, ევროკავშირის ელჩი საქართველოში, კარლ ჰარცელი იმერეთში, რაჭასა და სამეგრელოში იმყოფებოდა. ელჩი ჰარცელი შეხვდა მთავრობის, არასამთავრობო ორგანიზაციების და მედიის ადგილობრივ წარმომადგენლებს და ევროკავშირის მიერ დაფინანსებული პროექტების ბენეფიციარებს ეკონომიკური და სოფლის განვითარების, ბიზნესის, მეწარმეობის ხელშეწყობის, გარემოს, საზღვაო და სხვა სფეროებიდან.
„ევროკავშირი თვლის, რომ ძლიერი, აქტიური და წარმატებული რეგიონები საქართველოს განვითარების საწინდარია. ჩემთვის სასიამოვნო იყო გასული სამი დღის განმავლობაში წყალტუბოში, ამბროლაურსა და ფოთში სტუმრობა, რომლის დროსაც მე შევხვდი ადგილობრივ მოსახლეობას, მათთან ერთად განვიხილე გამოწვევები და შესაძლებლობები, მოვისმინე მათი მოსაზრებები და გავეცანი ევროკავშირის პროგრამების შედეგებს.“ – განაცხადა კარლ ჰარცელმა.