კონსტანტინე გამსახურდია სოციალურ ქსელში რძლის, ცოტნე გამსახურდიას ცოლის, ანა ჯაბაურის პოსტს აზიარებს და სტატუსს აქვეყნებს.
“ძვირფასო მეგობრებო, ცოტნეს საკმაოდ სწრაფმიმავალი რეაბილიტაცია ამა წლის მარტში შეფერხდა სერიული კრუნჩხვებით დამძიმებული ეპილეპტური სტატუსის გამო, რომელიც ამჟამად გერმანელი ექიმების ძალისხმევით დაძლეულია და ისევ საიმედო გზაზე ვართ, გვაქვს ყოველდღიურად გარკვეული პროგრესი. უმძიმესი პერიოდები გავიარეთ აჯიბადემში, იალოვაში, ჰაიდელბერგში, უნასა და ოსნაბრუკში. საქართველოს საელჩო გერმანიაში ყოველდღიურად იღებდა ინფორმაციას, ჩართული იყო ორგანიზაციულ საქმიანობაში. მთელი ამ ხნის მანძილზე ვგრძნობდით საქართველოს მთავრობის და კანცელარიის უპირობო მხარდაჭერას და მადლობას მოვახსენებთ მის მესვეურთ.
ის რაც ცოტნეს ახლა ჭირდება ეს არის სიმშვიდე, სრულიად პოზიტიური განწყობა და არავითარი ჩრდილები თუ დაძაბულობების ნარჩენი წარსული ცხოვრებიდან, ასევე ჭკვიანური, მიზანმიმართული და თანმიმდევრული რეაბილიტაცია, რაც სპეციალისტების ფიზიკურ შრომასთან და ჩართულობასთანაა კავშირში. რეაბილიტაციის პროცესში მნიშვნელობა ექნება ასევე ცოტნეს კონტაქტს საქართველოს მადლიან ბუნებასთანაც. მადლობა უპირველეს ყოვლისა ანა ჯაბაურს, ცოტნეს ცხოვრებისეულ თანამგზავრს, ვინც გარდა იმისა, რომ ცოტნეს გადასარჩენად თავგადადებული იბრძოდა სრულიად არაორდინალურ ვითარებაში, ასრულებდა არამარტო თავზე მდგომის, არამედ ყველანაირ, მათ შორის ჩვეულებრივი სანიტარის და მომვლელის ფუნქციებსაც. მადლობა ჩემს ძმას, გიორგის, რომელმაც გამოსავალი მოძებნა არაერთ კრიტიკულ სიტუაციაში, ასევე ანი აბულაძეს, გიორგის მეუღლეს, მადლობა ყველა ადამიანს, ვინც ოფიციალური თუ არაოფიციალური კუთხით ჩართული იყო ამ ამბებში. ასე რომ ძალიან იმედიანად ვართ.
****
გიორგი გამსახურდია ტვიტერზე წერს: “ურთულესი პერიოდი გავიარეთ უდავოდ,ცოტნეს გადარჩენა მარტივი საქმე არ იყო,რისთვისაც უდიდესი მადლობა ფონდ ქართუს და შემდგომ,ყველა პროცესის მონაწილეს.მადლობა განსაკუთრებულად ანას,გამძლეობისთვის და ცოტნეს უკიდეგანო სიყვარულისთვის.ვიღაცეების ბოროტული მონაროშები მხოლოდ მათ მიუბრუნდებათ”-წერს გამსახურდია.
ანა ჯაბაურმა საზოგადოებას ქმრის ჯანმრთელობის შესახებ გუშინ მიაწოდა ინფორმაცია და მხარდაჭერისთვის ყველას მადლობა გადაუხადა.
“მეგობრებო, პირველ რიგში უდიდესი მადლობა სიყვარულისთვის და იმ დადებითი ემოციებისთვის, რომელსაც ვგრძნობთ თქვენი მხრიდან. სწორედ პოზიტივი და მხოლოდ პოზიტივი, საყვარელი ადამიანების გარემოცვა, სიმშვიდე და სპეციალური ვარჯიშები არის ექიმის ის დანიშნულება, რომლითაც ჩამოვედით, ასევე ექიმის რეკომენდაციით, მშობლიურ ქვეყანაში. დღეს მომინდა თქვენც ყოფილიყავით თანამონაწილე ჩვენი, ჩემი და ცოტნეს, #გიორგიგამსახურდია-ს, Ani Abuladze-ს, Konstantine Gamsakhurdia-ს ბოლო პერიოდის ერთგვარი ტრადიციისა, როცა ერთად, თუნდაც დისტანციურად, ვხარობთ წინ გადადგმული ყოველი პატარა ნაბიჯით ცოტნეს საბოლოო გამოჯანმრთელების გზაზე, ვუზიარებთ ერთმანეთს სიხარულს, სიყვარულს და ვამხნევებთ ერთმანეთს. ჩვენ მხოლოდ ერთი მიზანი გვამოძრავებს ახლა – ცოტნე დაუბრუნდეს მის ჩვეულ მდგომარეობას, და, რადგან ძალა ერთობაშია, ჩვენ ამას აუცილებლად შევძლებთ.
თქვენ არ იცით რეალურად როგორი ძმობა, სიყვარული და თავგანწირვა შეუძლიათ ერთმანეთისთვის, საყვარელი ადამიანებისა თუ ქვეყნისთვის ამ სამ ძმას. ერთხელ უნდა მოგიყვეთ ყველაფერი, სულ ყველაფერი – კონსტანტინე, ცოტნე და გიორგი გამსახურდიების ნამდვილი ამბავი.”