საქართველოს რაგბის ნაკრების მთავარმა მწვრთნელმა, ლევან მაისაშვილმა კორონავირუსი დაამარცხა. ნაკრების ექიმის, ნუცა შამათავას განცხადებით, ამჟამად იგი უკვე დამოუკიდებლად სუნთქავს და რეაბილიტაციას გადის.
„თავისუფლად შეიძლება ითქვას, რომ ის გართულებები, რაც კორონავირუსმა გამოიწვია, ლევანმა დაამარცხა. მოხსნილია აპარატიდან და დამოუკიდებლად სუნთქავს. ფიზიოთერაპევტებთან ერთად გადის აქტიურ რეაბილიტაციას. დღეს უკვე გარეთაც ჰყავდათ გაყვანილი. მისი მდგომარეობა დამაკმაყოფილებელია. სასიცოცხლო ნიშნები, ანალიზები გაუმჯობესდა“, – განაცხადა საქართველოს მორაგბეთა ნაკრების ექიმმა, ნუცა შამათავამ.
ლევან მაისაშვილი კორონავირუსით სამხრეთ აფრიკაში დაინფიცირდა, სადაც საქართველოს ნაკრები 3 ივლისს მსოფლიო ჩემპიონს შეხვდა, ხოლო 10 ივლისს გასამართი ტესტ-მატჩი გუნდებში კოვიდის გავრცელების გამო გაუქმდა.
მაისაშვილი ერთ თვეზე მეტია, რაც იოჰანესბურგის კერძო კლინიკაში, Milpark Hostpitals-ში მკურნალობს და ამ პროცესში თავიდანვე ჩართულნი არიან საქართველოს ელჩი ბექა დვალი და სამხრეთ აფრიკაში მოღვაწე ქართველი ექიმი ვახტანგ რეხვიაშვილი. მაისაშვილის მდგომარეობა რამდენიმე კვირის განმავლობაში კრიტიკულად მძიმე იყო, თუმცა, საბედნიეროდ, „ბორჯღალოსნების“ მთავარი მწვრთნელის მდგომარეობა საგრძნობლად გაუმჯობესდა და დადებითი დინამიკა ყოველდღიურად შეინიშნება.