პარლამენტის თავმჯდომარის პირველი მოადგილე, გია ვოლსკი ექსპრეზიდენტის მიერ დღეს გავრცელებულ ვიდეოს „ფეიკს“ უწოდებს და აცხადებს, რომ მიხეილ სააკაშვილი ამით საკუთარ დივერსანტობას უსვამს ხაზს.
„არც ვინმეს დამშვიდებას და არც არავის გაბრაზებას არ ვაპირებ. საზოგადოება ხედავს სცენარს, რომელიც ჩვენ თვალწინ ვითარდება. ჩემგან, დამატებითი კომენტარი საჭიროც არ არის. მისი მთავარი ამოცანა არა არჩევნები, არამედ დაძაბულობისა და შეხლა-შემოხლის ორგანიზებაა. 2014 წლიდან, სააკაშვილი ქადაგებს, რომ ხელისუფლება არანაირი არჩევნებით არ უნდა შეიცვალოს. ამ „ფეიკვიდეოთი“ ხაზს უსვამს; შემოვიპარე საქართველოში, პოლიტიკური დივერსანტი ვარო და მიუხედავად ჩემი დივერსანტობისა, თქვენ წადით და არჩევნებზე ხმა მიეცით „ნაცმოძრაობასო“, – აღნიშნა გია ვოლსკიმ.
საქართველოს ყოფილმა პრეზიდენტმა, უკრაინის რეფორმების აღმასრულებელი საბჭოს თავმჯდომარე მიხეილ სააკაშვილმა დღეს საკუთარ გვერდზე გამოაქვეყნა პოსტი, რომლითაც მიანიშნებს, რომ არალეგალურად შემოვიდა ქვეყანაში და უკვე საქართველოშია. ასევე, მიხეილ სააკაშვილმა გაავრცელა ვიდეო, სადაც ამბობს, რომ ბათუმში იმყოფება.
საქართველოს შინაგან საქმეთა სამინისტროში ყოფილი პრეზიდენტის, მიხეილ სააკაშვილის საქართველოში ჩამოსვლასთან დაკავშირებით აცხადებენ, რომ სააკაშვილს საქართველოს საზღვარი არ გადმოუკვეთავს.