„ევროპული საქართველოს“ წევრმა, გიგი უგულავამ, მე-15 უბანზე ხმის მიცემის შემდეგ, მედიასთან კომენტარი გააკეთა და, მათ შორის, მიხეილ სააკაშვილზეც ისაუბრა. ტელეკომპანია „იმედის“ ჟურნალისტი დაინტერესდა, როგორ აფასებს უგულავა იმ საქმეებს, რომლებშიც მიხეილ სააკაშვილი მსჯავრდებული თუ ბრალდებულია. ამ კითხვებმა, გიგი უგულავა გააღიზიანა.
„იმედის“ დარბევის საქმეზე დასმული კითხვის პასუხად, თავდაპირველად, მან თქვა, რომ არ აპირებდა, „იმედის“ კითხვებისთვის ეპასუხა, თუ ტელევიზია მას პირდაპირ ეთერს არ დაუთმობდა, შემდეგ კი, განაცხადა, რომ ჟურნალისტის კითხვების ფორმულირება არ მოსწონდა.
„როდესაც პირდაპირ ეთერს მომცემთ, ყველა თემაზე ვისაუბრებ. ტელეკომპანია „იმედის“ საქმეზე, გადაწყვეტილება ჯერ არაა მიღებული, მიმდინარეა. მიმდინარე იცით რა არის? ეგ ბრალდება მეც მაქვს. მარგარიტა სიმონიანის RT-სა და თქვენ შორის განსხვავება აღარაა“, – აღნიშნა გიგი უგულავამ.