ოთხი პოლიტიკური პარტია: “ნაციონალური მოძრაობა”, “ლელო”, “დროა” და “გირჩი – მეტი თავისუფლება” პარასკევს, 19 ნოემბერს ერთობლივ აქცია-მსვლელობას გამართავს. დეტალებზე ინფორმაცია მედიას “ნაციონალური მოძრაობის” თავმჯდომარემ, ნიკა მელიამ მიაწოდა.
15:00 საათზე აქცია თბილისში, სამ მეტროსადგურთან გაიმართება. ეს ადგილებია:
მეტროსადგური “ავლაბართან” შეიკრიბებიან “ნაციონალური მოძრაობის” მხარდამჭერები;
მეტროსადგური “სადგურის მოედანი” – იკრიბება “ლელო” და მისი მხარდამჭერები;
მეტროსადგური “სახელმწიფო უნივერსიტეტი” – იკრიბება “გირჩი – მეტი თავისუფლება” და “დროა”.
“ყველა ხვდება, რომ საქართველოში სწრაფი ტემპით ყალიბდება რუსული ტიპის ავტოკრატია. ჩვენ “ქართული ოცნების” რეჟიმი საქათველოს მოქალაქეებს გვართმევს ისტორიულ არჩევანს, რომელიც გულისხმობს კანონის უზენაესობაზე, ადამიანის უფლებათა დაცვაზე მდგომ სახელმწიფოს, რომელიც უნდა იყოს ინტეგრირებული ცივილიზებულ დემოკრატიულ სამყაროსთან. ამ ყველაფერზე ღიად განაცხადეს უარი. ამაზე ღიად, საჯაროდ და გულწრფელად “ქართული ოცნება” ვერასდროს ვეღარ გვეტყვის, რომ ისტორიული არჩევანი იცვლება.
ჩვენი, საქართველოს მოქალაქეების ვალია, განურჩევლად პროფესიისა, სტატუსისა, ვართ მწერლები, პოლიტიკოსები თუ უბრალოდ საქართველოს პასპორტი უდევს ჯიბეში, ყველას გვაქვს ერთი მიზანი და ამოცანა, რომ არ მოხდეს ის, რაც მოხდა რუსეთსა და ბელარუსში – რუსული ტიპის ავტოკრატიამ საქართველოში ფესვები ვერ უნდა გაიდგას”, – თქვა მელიამ.
პარტიის ლიდერები ამბობენ, რომ ეს იქნება მშვიდობიანი აქცია.
“ნაციონალური მოძრაობის” ორგანიზებით პერმანენტული აქციები თბილისში 8 ნოემბრიდან სხვადასხვა ადგილზე ერთდროულად იმართებოდა. დღეს, 17 ნოემბერს აქციები ჩანიშნული არ არის, თუმცა დაანონსდა ახალი გეგმის შესახებ, რომელშიც რამდენიმე პარტია მიიღებს მონაწილეობას.
ამ დრომდე გამართული აქციების მიზანი დაპატიმრებული საქართველოს მესამე პრეზიდენტის, მიხეილ სააკაშვილის სამოქალაქო, მაღალპროფილურ კლინიკაში გადაყვანა იყო. სააკაშვილი საქართველოში 1 ოქტომბერს დააკავეს და ის უკვე 48 დღეა შიმშილობს.